साथीको हत्या गरी जंगलमा फाल्ने ४ जना सार्वजनिक

कपिलवस्तु ।
इलाका प्रहरी कार्यालय बुटवलले हत्या अरोपमा पक्राउ परेका ४ जनालाई बुधबार सार्बजनिक गरेको छ ।
बुधबार इलाका प्रहरी कार्यालयमा पत्रकार सम्मेलन गरी प्रहरीले रुपन्देहीको सैनामैना नगरपालिका वडा नम्वर- १० सालझण्डीमा कपिलवस्तुको बाणगंगाका २७ बर्षिय चिरञ्जीवी आचार्यको हत्यामा संलग्न ४ जनालाई सार्बजनिक गरेको हो ।
पक्राउ पर्नेमा कपिलवस्तु बाणगंगा ६ का ३३ वर्षिय रमेश बिक, २८ बर्षिय गोपाल खनाल, २४ बर्षिय बसन्त खत्री र २० वर्षिय राजु बिक छन् । हत्यामा संलग्न ४ जनालाई नै प्रहरीले पक्राउ गरेको छ ।

गएको आइतबार राति स्थानीय एक रेस्टुरेण्टमा रक्सी पिएर मोबाइल हराएको विषयमा विवाद भएपछि आचार्यलाई जंगलमा लगेर हत्या गरेको अनुसन्धानबाट खुलेको प्रहरीले बताएको छ । झगडा भएपछि हत्याको योजना बनाएका राजु विक र रमेश विकले आचार्यलाई जंगलमा ल्याएर ढुङ्गाले हानेर हत्या गरेपछि उनीसँग भएको १३ हजार नगद लिएर मोटरसाइकल कपिलवस्तुको खयरघारी जंगलमा लगेर छोडेका थिए ।
राजु र रमेश नै घटनाका मुख्य योजनाकार रहेको प्रहरीले बताएको छ । आचार्यको शव सोमबार रुपन्देहीको सैनामैना १० सालझण्डीको जंगलमा भेटिएको थियो । हत्यामा संलग्न सबै हत्या गरिएका आचार्यका साथीहरु रहेको प्रहरीले बताएको छ ।

यो पनि पढ्नुहोस

सालझण्डी जंगलमा एक पुरुषको शव फेला !

सालझण्डी जंगलमा भेटिएको शवको पहिचान, हत्या आशंकामा केही पक्राउ !