मायादेवी अनलाइन, कपिलवस्तु ।
कपिलवस्तुको बाणगंगा ५ झण्डामा रहेको श्री मावि झण्डामा लगाइएको ताला तिनदिन पछि मंगलबार खुलेको छ । विद्यालयमा शिक्षक नियुक्ति गर्दा व्यवस्थापन समितिले एकलौटी गरेको भन्दै केही असन्तुष्ट राजनैतिक समुहले असार १ गतेदेखि तालाबन्दी गरेको थियो । हिजो र अस्ति व्यवस्थापन समितिको निर्णय र असन्तुष्ट समुहको मागका विषयमा सहमति गर्ने प्रयास भएपनि टुंगोमा पुग्न सकेको थिएन ।
त्यसपछि विवाद समाधान गर्न सर्वदलीय बैठक बोलाउने निर्णय भएअनुरुप आज बैठक बसेर विद्यालयमा लगाइएको तालाबन्दी खुलाइएको हो । सर्वदलीय बैठकले विवाद समाधान गर्न विषयगत शिक्षक नियुक्ति गर्नुपर्ने बताएपछि त्यसमा असन्तुष्ट पक्षले पनि सहमति जनाएको विद्यालयकी प्रधानाध्यापक कृष्ण टण्डनले जानकारी दिनुभयो ।
विद्यालय व्यवस्थापन समितिका अध्यक्ष कमल प्रसाद खनालको अध्यक्षतामा बसेको बैठकले शिक्षक नियुक्ति या अन्य कुनै पनि कारणले विद्यालयको पठनपाठन प्रभावित गर्न नहुने निर्णय गरेको प्रधानाध्यापक टण्डनले जानकारी दिनुभयो । तालाबन्दी खुलेपछि अहिले पठनपाठन सुचारु भएको छ ।
मंगलबार मात्रै शुद्धोधन जनजीवन मावि जिनवाको ताला खुलेको छ । श्री गौरी भवानी मावि भक्तौलीमा पनि ताला लागेको छ ।
प्रतिक्रिया