भोलिदेखि दोस्रो तानसेन महोत्सव

पाल्पा ।
शुक्रबारदेखि दोस्रो तानसेन महोत्सव हुने भएको छ।

पाल्पा व्यापार संघको आयोजनामा हुने महोत्सव आगामी वैशाख ३ गतेसम्म सञ्चालन हुनेछ। महोत्सवको सम्पूर्ण तयारी पूरा भएको संघका अध्यक्ष विष्णुबहादुर कार्कीले बिहीबार पत्रकार सम्मेलन गरी जानकारी दिए।

तानसेनसहित समग्र जिल्लाको पर्यटन, व्यापार, रोजगारी, कृषि उद्योगको विकास र विस्तारमा महोत्सवले टेवा पुग्ने उनले बताए।

महोत्सवमा तीन सयभन्दा बढी स्टल रहनेछन्। नेपालको पहिलो र ठूलो फिस टनेल महोत्सवमा मुख्य आकर्षकको रूपमा रहेको छ। यहाँ विभिन्न प्रजातिका जिउँदो माछाको दृश्य अवलोकन गर्न पाइनेछ।

कृषि उत्पादन, लघु तथा घरेलु उत्पादनको प्रदर्शनी, शैक्षिक सामग्री, विभिन्न वेशभूषा, कला संस्कृति संस्कृति झल्किने झाँकी प्रदर्शन हुने संघका महासचिव तुलबहादुर अधिकारीले बताए। तानसेन डान्स आइडल हुनेछ। राष्ट्रिय तथा अन्ताराष्ट्रिय कलाकारको दैनिक प्रस्तुति रहने अधिकारीले बताए।

पाँच लाख दर्शकले अवलोकन गर्नेछन्। ८ करोडभन्दा बढीको कारोबार हुने आयोजकको दाबी छ।

तानसेन नगरपालिका मुख्य आयोजक रहेको छ। नगरपालिकाले एभरेष्ट इभेन्ट म्यानेजमेन्ट प्रालि चितवनलाई ९५ लाखमा महोत्सव गर्ने ठेक्का दिएको हो। प्रालिले यसको व्यवस्थापन गर्नेछ। पाल्पा व्यापार संघ आयोजक बनेको हो।

महोत्सवस्थलमा पाल्पा दरबारशैलीको सचिवालय निर्माण गरिएको छ।