गुडरुङ खोलामा स्वाभिमानको व्यथिति, जेसिबिबाट खोला उत्खनन

मायादेवी अनलाइन, बुद्धभूमि ।
कपिलवस्तुको गुडरुङ खोलामा स्वाभिमान कन्ट्रक्सनले व्यथिति मच्चाएको छ । नदीजन्य पदार्थ निकासीको ठेक्का पाएको स्वाभिमानले खोलामा जेसिबिको प्रयोग गरेको छ भने, नाँपजाँज नगरेको स्थानबाट खोला उत्खनन् गरिरहेको छ ।

सम्झौता विपरित नदीजन्य पदार्थ निकाली रहेको स्वाभिमानले खोलामा बेथिति मच्चाँइ रहदा नियामक निकाय मुखदर्शक बनेको स्थानीयले आरोप लगाएका छन् ।

स्भाभिमानका संचालक हुन् कृष्ण पोख्रेल । बुटवल नयाँगाउँ निवासी पोख्रेलले हरेक बर्ष गुडरुङ खोलामा ठेक्का लगाउँदै आएका छन् । गत बर्षपनि यहीँ नाकामा ठेक्का पाएका उनले यसैगरी व्यथिति मच्चाएका थिए ।

हरेक बर्ष एउटै नाकामा ठेक्का लगाउँदै आएका उनको यहीँ नाकामा क्रसर उद्योग छ । खोलाबाट नदीजन्य पदार्थ निकालेर घाटगद्धी मार्फत निकासीको ठेक्का पाएका उनले नगरपालिकाको आँखा छलेर सिधै आफ्‌नो क्रसरमा नदीजन्य पदार्थ लैजाने गरेको नाम नबताउने शर्तमा एक स्थानीयले बताए ।

‘क्रसरसँगै जोडिएको स्थानमा घाटगद्धी गराउनू नै शंकाको विषय छ’, ती स्थानीयले भने ।

स्वाभिमानले गुडरुङ खोलाबाट १८ हजार घनमिटर नदीजन्य पदार्थ उत्खनन गर्ने ठेक्का पाएको हो । झण्डै ५८ लाख रकममा उनले ठेक्का पाएको ठेकेदार प्रतिनिधि यदुमणी पोख्रेलले बताए । ठेक्का आफूले पार्दै गर्दा उनले नगरले तोकेको दररेटमा दुई लाख मात्र बढाएका थिए ।

निकासी खुलेको एक महिना भित्रै तोकिएको परिमाणको उत्खनन भइसकेको खोलाको अवस्था हेर्दा प्रमाणित हुन्छ । ठेक्का पाएको दिनदेखि नै स्वाभिमानले खोलामा दिनहुँ जसो जेसिबिको प्रयोग गरिरहेको छ । जेसिबिबाट नदीजन्य पदार्थ निकालेको हुँदा तोकिएको परिणाम एक महिना भित्रै सकिएको ठेक्कामा शेयर हालेका एक युवाले बताए ।

मंगलरबार मात्र स्वाभिमानले खोलामा जेसिबि प्रयोग गरिरहेको थियो । जेसिबिले टिप्पर र ट्याक्टरलाई माल भरिरहेको थियो ।

क्रसरमा रहेका जेसिबिले नपुगेर उनले अर्को जेसेबी थपेको जेसिबी चालकले बताए । उनले टेक्टर फसेको निकाल्ने निहुँमा कहिलेकाँही टिप्परमा भर्ने गरेको स्विकारे । रातदिन खोला उत्खनन गरिरहेको गाउँले पनि बताउँछन् । नियामक निकाय मुखदर्शक हुँदा आफूहरुले पटकपटक यो विषय उठाउँदा कुनै सुनुवाई नभएको गाउँलेले गुनासो गरे ।

‘यो खोलामा अव्यस्थित तरिकाले खोला उत्खनन गर्दा हरेक बर्ष गुडरुङले कटान गर्दै आएको छ ।

हेक्टरौं वन क्षेत्र खोलामा परिणत भएको छ भने खोलामा रहेको पानी समेत पातलिएको छ,’ रुखहरु ढलेको ढलै छन् । ठेकेदारको मनपरी कस्ले रोक्ने गाउँलेहरु प्रश्न गर्छन् ।

नगरले अनुमति नदिएको ठाउँमा पनि छ अवैध डम्पिङ्ग

त्यसो त स्वाभिमान कन्ट्रक्सन यतिमा मात्र सिमित छैन् । नगरले तोकेको क्षेत्रभन्दा अन्य ठाउँमा पनी डम्पिङ्ग भैरहेको छ । उक्त डम्पिङ्ग अवैध भएको स्वाभिमानका प्रतिनिधिहरु नै स्वीकार गर्छन् । तर कस्को भन्ने विषयमा जवाफ लुकाउँछन् । त्यस विषयमा त्यहाँका स्थानीय सर्वसाधारणले गाउँका टाठाबाठा र ठेकेदारको मिलेमतोमा सो डम्पिङ्ग भएको र त्यो बेलाबेलामा सोहि क्रसरमा जाने गरेको बताए ।

ट्रेक्टर डम्पिङ्गमा, टिप्पर क्रसरमा

नाकाबाट निकासी भएको नदीजन्य पदार्थ नगरपालिकाले तोकेको डम्पिङ्गमा लैजानुपर्ने प्रावधान छ । त्यहाँबाट नगरपालिकाका नियामक निकायले परिणाम एकिन नापजाँच गरेर मात्र विक्रि गर्ने नियममा उल्लेख छ ।

तर डम्पिङ्ग नजिक क्रसर भएकाले स्वाभिमानले टेक्टरहरु डम्पिङ्गमा पठाएर जेसिबि मार्फत लोड गरिएका टिप्पर भने क्रसरमा पुर्‍याउने गरेको पाइएको हो ।