बाबुराम रायमाझी, जितपुर ।
वाणगंगा ९, पडरियामा स्थित ऐतिहासिक रामजानकी मन्दिरमा राम नवमिको अवसरमा विशेष धार्मिक कार्यक्रमको आयोजना भएको छ। रामजानकी मन्दिर समितिको पहलमा आयोजना गरिएको उक्त कार्यक्रममा भरतलाल शास्त्री रामलिलाको प्रमुख प्रस्तोता श्रीकृष्ण रासलिला प्रस्तुत गर्नेछन्, जसले कृष्णको दिव्य प्रेम र भक्तिको अद्भुत झलक प्रस्तुत गर्ने छन् । यसै अवसरमा लुम्बिनी प्रदेशका पूर्व स्वास्थ्य मन्त्री तथा कार्यक्रमका प्रमुख अतिथि बिष्णु पन्थीले मन्दिर परिसरको विकास र दीर्घकालीन योजनाका बारेमा आफ्नो विचार व्यक्त गर्दै भने, रामजानकी मन्दिर स्वयं एक सम्पन्न साधन श्रोत भएको ठाउँमा दीर्घकालिक सोचका साथ काम गरिन्छ भने यो स्थान एक प्रमुख पर्यटकीय गन्तव्य बन्ने छ ।
कार्यक्रममा बाणगंगा नगरपालिकाका उपमेयर रिता कुमारी चौधरीले धार्मिक कार्यक्रमहरूको महत्त्वको बारेमा चर्चा गर्दै ूयस्ता धार्मिक कार्यक्रमहरूले समुदायमा बढ्दो विकृति किशोर–किशोरीका बीचमा फैलिएका दुर्व्यसनलाई न्यूनीकरण गर्न मद्दत पुर्याउने बताउदै धार्मिक, सांस्कृतिक र संस्कारको विकासमा पनि मद्दत पुग्ने बताइन् ।
वडा अध्यक्ष कमल पौडेलले मन्दिरको विकास र सौन्दर्यकरणका लागि प्रदेश सरकारसँग समन्वय गरी काम गर्ने प्रतिबद्धता व्यक्त गरे। उनले भने,यस पवित्र स्थानको पर्यटकीय र धार्मिक महत्वलाई ध्यानमा राख्दै यसलाई व्यवस्थित र आकर्षक बनाउनका लागि सबै पक्षसँग मिलेर काम गर्नेछौं ।
उद्घाटन समारोहमा समाजसेवी बिन्द्र गुरुङ लगायत अन्य व्यक्तिहरूले यज्ञ सफलताको शुभकामना दिएका थिए। समारोहको अध्यक्षता रामजानकी मन्दिर समितिका कार्यबाहक अध्यक्ष जंजिर प्रसाद चौधरीले गरेका थिए, र कार्यक्रम समाजसेवी लाल बहादुर खडकाको संचालनमा सम्पन्न भएको थियो।
कार्यक्रममा सन्त महन्त, बुद्धिजीवी, समाजसेवी, पत्रकार र अन्य समुदायका व्यक्तिहरूको सहभागिता रहेकोे थियो।
यस कार्यक्रमको आयोजनाले रामजानकी मन्दिरको महत्त्व र यसको सम्भावित पर्यटकीय भविष्यलाई उजागर गर्दै, यस स्थानको प्रगति र विकासको लागि विभिन्न पक्षबाट सहयोग र समर्थनको आह्वान गरेको छ।यज्ञ चैत १७ देखि २५ गतेसम्म संचालन हुने आयोजकले जनाएको छ ।
प्रतिक्रिया