दीपा महत, तौलिहवा ।
कपिलवस्तुका नयाँ प्रमुख जिल्ला अधिकारी दिलिप कुमार तामाङले कपिलवस्तुमा लागूऔषध नियन्त्रणका लागि विशेष चासो दिएका छन् ।
हालै जिल्ला आएका प्रजिअ तामाङले मंगलबार सरोकारवाला निकाय, राजनैतिक दलका प्रतिनिधीसंग राखेको परिचायात्मक अन्तरकृयामा खुलेरै लागूऔषधको अवस्था, नियन्त्रणका उपाय र चुनौतीबारे छलफल गरेका हुन् ।
तामाङले जिल्लामा रहेका विभिन्न समस्या मध्ये लागूऔषध दुब्र्यसन प्रमुख रहेको भन्दै यस विरुद्ध विशेष कदम चाल्ने बताए ।
तामाङले लागू औषधलाई कसरी नियन्त्रणमा लिन सकिन्छ भनेर जिल्लाका सरोकारवाला निकाय तथा राजनैतिक दलसंग राय मागेका थिए ।
सोही अवसरमा जिल्ला प्रहरी कार्यालय कपिलवस्तुका प्रहरी नायव उपरिक्षक मोहनमणि अधिकारीले जिल्लामा लागूऔषध ओसारपसार तथा यसको प्रयोगबारेको अवस्था, प्रहरीले संचालन गर्न लागेको लागूऔषध विरुद्धको ३ महिने अभियानका बारे जानकारी गराएका थिए । प्रनाउ अधिकारीले खुला सिमानाका कारण जिल्लामा लागूऔषधको समस्या बढेको भन्दै घरपरिवार संगै सिंगो समुदायको साथ तथा सहयोगबाट मात्र लागूऔषध नियन्त्रण गर्न सकिने बताए ।
कार्यक्रममा युवा नेता प्रकास घिमिरेले सिमानाकाबाट युवाहरु लागूऔषध सेवन गर्न भारत जाने र सेवन गरी फर्कने गरेको बताए । मापसे चेकिङ गर्ने यन्त्र भएपनि लागूऔषधको चेकजाँचका लागि जिल्लामा कुनै यन्त्र नभएकाले यसका लागि सिमानाकामा खटिने प्रहरीले उनिहरुलाई काउन्सेलिङ गर्नुपर्ने बताए ।
अन्तरक्रियामा सहभागिले विभिन्न क्याम्पसमा पढ्ने विद्यार्थीले क्याम्पस हाता भित्रै चुरोट तान्ने गरेको भन्दै यसलाई रोक्नुपर्ने बताए । हामीले देखेका छौ, ‘क्याम्पसहाता भित्रै विद्यार्थीले चुरोट तान्ने गर्दछन लागूऔषधको प्रयोग त्यहिबाट सुरुहुन्छ हुन्छ, सुरुमा त चुरोट तान्छन् पछि चुरोट भित्र गाँजा मिसाएर तान्ने गर्दछन् र विस्तारै उनिहरु कुलतमा फस्ने गरेका छन् यसलाई रोक्नुपर्छ । ’ विभिन्न फार्मेसीमा पनि निषेध गरिएको औषधीको विक्रिवितरण हुनेगरेको भन्दै यसलाई रोक्न सुझाव दिए ।
समाजका बुद्धिजिवी ब्यक्तीपनि यस्ता कार्यमा संलग्नरहने रहेको भन्दै त्यस्ता ब्यक्तीको पहिचान गर्नुपर्ने बताए । नेकपा माओवादीका जिल्ला संयोजक विष्णु बेल्वासेले पछिल्लो समय लागूऔषध नियन्त्रण र यसमा संलग्न फरारप्रतिवादी पक्राउ अभियानमा प्रहरीको सक्रियता उल्लेखनिय रहेको बताए । लागूऔषध नियन्त्रण प्रहरीको सक्रियतामा मात्र सम्भव नहुने भन्दै घरपरिवार तथा समुदायको सक्रियता आवश्यक पर्ने बताए ।
सहभागीको सल्लाह सुक्रावलाई आफुले गम्भीर रुपमा लिएको भन्दै प्रमुख जिल्ला अधिकारी तामाङले कपिलवस्तुमा लागूऔषध नियन्त्रणका साथै नदीजन्य पदार्थको अबैद्य उत्खनन् तथा चोरी हुने गरेको पाइएकाले यसतर्फ पनि आफु सचेत रहेको बताए । कपिलवस्तु संबेदनशिल जिल्ला भएकाले यहा शान्ती सुब्यवस्था कायम गर्ने बताए ।
तथ्यमा आधारित सुचना दिन आग्रह
कपिलवस्तुका प्रमुख जिल्ला अधिकारी दिलिप कुमार तामाङले सत्यसथ्यमा आधारित समाचार तथा सुचना प्रसारण गर्न पत्रकारलाई आग्रह गरेका छन् । सरोकारवालसंगको अन्तरकृयापछि संचारकर्मीसंग कुराकानी गर्दै तामाङले भने, ‘पहिला के थियो त्यो छाड्नुस प्रहरी प्रशासनबाट पनि केहि गल्ती भएका छन् भने तथ्यमा आधारित रहेर जानकारी गराउनुहोला, तपाईले दिएको जानकारी तथ्यपरक हुनुपर्यो अन्य काम हामी गर्छौ ।’
आफु जिल्लाको समग्र शान्ती, सुरक्षाका लागि तत्पर रहने बताए । पत्रकारको जिम्मेवारी गल्ती औल्याइदिने भएको भन्दै आफुहरुबाट पनि केहि कमजोरी भएमा त्यसलाई ढुक्क भएर औल्याइदिन आग्रह गरे ।
प्रतिक्रिया