बाणगंगा ।
१५ औं कपिलवस्तु महोत्सवको मुख्य आकर्षणका रुपमा रहेको १३औं कपिलवस्तु डान्स आइडलको उपाधि हात पार्ने प्रतिस्पर्धीको आज (मंगलबार) टुंगो लाग्दैछ । उपाधिको होडमा ४ जना प्रतिस्पर्धीहरु छन् ।
उपाधि होडबाट सोमबार जस्मिन घिमिरे बाहिरिएसंगै आइडलको ‘ग्राण्ड फिनाले’ मा पवित्रा कुमारी छहारी, निलम पौडेल, प्रतिज्ञा गिरी र प्रिन्सा हमाल प्रवेश गरेको डान्स आइडल संयोजक विष्णु मल्लले जानकारी दिईन् । जस्मिनलाई ससम्मान विदाई गरेको उनले बताईन् ।
१३औं कपिलवस्तु डान्स आइडल अन्तर्गत १५ जना प्रतिस्पर्धी स्टेज चडेका थिए ।
१३औं कपिलवस्तु डान्स आइडलको विजेताले नगद १ लाख ११ हजार १११ रुपैयाँसहित चाँदीको ट्रफी प्राप्त गर्ने छ भने उपविजेताले ७७ हजार ७७७, तृतीयले ५५ हजार ५५५ र सान्तवना हुनेले २५ हजार ५२५ रुपैयाँसहित ट्रफी र विभिन्न गिप्ट ह्याम्परहरु प्राप्त गर्ने छन् ।
यस्तै कपिलवस्तु उद्योग बाणिज्य संघले मंसिर १९ गतेदेखि आयोजना गरेको १५औं कपिलवस्तु महोत्सवको समापन आज मंगलबार भव्य रुपमा हुदैंछ । महोत्सवको समापन गर्न लुम्बिनी प्रदेश सरकारका भौतिक पूर्वाधार विकास मन्त्री भूमिश्वर ढकाल आउने कार्यक्रम तय भएको संघका अध्यक्ष तथा महोत्सवका संयोजक गणेश बहादुर क्षेत्रीले जानकारी दिए ।
समापन कार्यक्रममा चर्चित थारु गायक राज कुस्मी, प्रतिक्षा ब्यान्डका साथै डिजे लगायत स्थानीय कलाकारहरुको बेजोड प्रस्तुति रहने महोत्सवका मनोरञ्जन तथा सांस्कृतिक कार्यक्रम संयोजक राँमजी सेनले जानकारी दिए ।
कपिलवस्तु उद्योग बाणिज्य संघद्धारा आयोजित १५औं कपिलवस्तु महोत्सव एवम् कृषि, पर्यटन तथा औद्योगिक प्रदर्शनी “सक्षम व्यवसायी, समुन्नत राष्ट्र र आत्मनिर्भर अर्थतन्त्र” भन्ने मूल नाराका साथ बाणगंगाको चारनम्बर जीतपुरस्थित बुद्धरंगशालामा मंसिर १९ गते देखि सुरु भएको हो ।
प्रतिक्रिया