१५ औँ कपिलवस्तु महोत्सवको ७० प्रतिशत तयारी पूरा निर्देशक पौडेल

वाणगंगा।
कपिलवस्तु उद्योग वाणिज्य संघले आयोजना गर्न लागेको १५ औँ कपिलवस्तु महोत्सवको बिहिबारसम्म ७० प्रतिशत तयारी पूरा भएको छ । महोत्सवको उद्घाटन अगावै सबै काम सम्पन्न गर्ने लक्ष्यका साथ तीव्र गतिमा काम भइरहेको महोत्सव निर्देशक समेत रहेका संघका वरिष्ठ उपाध्यक्ष हुमानाथ पौडेलले जानकारी दिए । पौडेलका अनुसार महोत्सवमा साढे २ लाख दर्शक भित्र्याउने र करिब १० करोडको आर्थिक कारोबार गर्ने लक्ष्य राखिएको छ । उनले भने, “कम्पाउण्ड निर्माणदेखि स्टल, मञ्च, सचिवालय, प्रवेशद्वारसम्मका काम धमाधम भइरहेका छन् । महोत्सवको प्रवेशद्वार पशुपतिनाथ मन्दिरको स्वरूपमा निर्माण गरिनेछ ।” अन्य महोत्सवभन्दा फरकपन दिने बताउदै पौडेलले यस पटकको महोत्सवलाई अघिल्ला महोत्सवभन्दा उत्कृष्ट र आकर्षक बनाउन विशेष ध्यान दिइएको बताए । उनले भने, “यस जिल्लाभित्र रहेका धार्मिक, ऐतिहासिक तथा पर्यटकीय, औद्योगिक तथा व्यापारिक क्षेत्रको डकुमेन्ट्री निर्माण गरी महोत्सव अवधिभर प्रदर्शन गरिनेछ ।

आर्थिक गतिविधीमा टेवा पुग्ने विश्वास

महोत्सवले औद्योगिक एवं हस्तकलाका उत्पादन, सूचना प्रविधि, शिक्षा, स्वास्थ्य, पर्यटन लगायत कृषिजन्य उत्पादनको प्रवर्द्धन तथा बजारीकरणमा सघाउ पुग्ने पौडेलको विश्वास छ । उनले भने, “आर्थिक मन्दीको मारमा परेका उद्यमी व्यवसायी र आम सर्वसाधारणलाई आर्थिक गतिविधीमा, पुनरुत्थानको आयामको रूपमा महोत्सवलाई लिन सकिन्छ ।”

१५ औँ कपिलवस्तु महोत्सव कृषि, पर्यटन तथा औद्योगिक प्रदर्शनी कपिलवस्तु उद्योग वाणिज्य संघको आयोजनामा यही मंसिर १९ गतेदेखि पुस २ गतेसम्म बाणगंगा नगरपालिकाको बुद्धरंगशालामा हुनेछ । १५ औं कपिलवस्तु महोत्सव सफल बनाउन मिडिया र कपिलवस्तु उद्योग बाणिज्य संघ प्रतिबद्ध रहेकाे समन्वयात्मक बैठक भएको थियो ।