कपिलवस्तुबाट पशुलाई निर्दयी व्यवहार गरेको आरोपमा ४ जना पक्राउ

काठमाडौँ ।
पशुलाई निर्दयी व्यवहार गरेको आरोपमा प्रहरीले कपिलवस्तुको बुद्धभुमि नगरपालिका वडा नम्बर–२ बाट ४ जनालाई पक्राउ गरेको छ । पश्चिमबाट पूर्वतर्फ बागमती प्रदेश–०३–००१ ख १९९२ नम्बरको ट्रकमा उनीहरूले २४ वटा गोरुलाई निर्दयी तरिकाले बाँधेर लगेको भेटिएको छ ।

पक्राउ पर्नेमा मोरङको विराटनगर उपमहानगरपालिका–३ घर भएका ३८ वर्षीय हेमु श्रेष्ठ, २७ वर्षीय रमेश श्रेष्ठ, सुनसरी घर भएका इसाद आलम र २७ वर्षीय समिम आलम छन् । इलाका प्रहरी कार्यालय गोरुसिङ्गेबाट खटिएको टोलीले उनीहरूलाई पक्राउ गरेको हो ।

उनीहरूले गोरुलाई यातना हुनेगरी पुच्छर बाँधेको, नाक छेडेको र श्वास लिन अप्ठेरो हुनेगरी त्रिपालले छोपेको कपिलवस्तुका एसपी निरञ्जनदत्त भट्टले बताए । उनले भने,‘गोरुको सिङबाट रगत आउँदा पनि उनीहरूले निर्दयी व्यवहार गरिरहेको भेटिएको छ ।’

आरोपीहरू विरुद्ध प्रहरीले जिल्ला प्रशासन कार्यालय कपिलवस्तुबाट म्याद लिएर अनुसन्धान गरिरहेको छ ।