चक्रवाती आँधी दानाबारे भारतीय मौसम विभागले जारी गर्‍यो यस्तो अलर्ट

नयाँ दिल्ली ।
चक्रवाती आँधी दाना बिहीबार पश्चिम बंगाल र ओडिशाको तटमा पुग्ने सम्भावना छ । यसैलाई मध्यनजर गर्दै दुवै प्रदेशका प्रशासन तयारीमा जुटेका छन् । भारतीय मौसम विज्ञान विभागका निर्देशक मनोरमा मोहन्तीले दाना आँधीबारे जानकारी दिएका छन् ।

‘दाना आँधीले गत राति घातक चक्रवाती आँधीको रुप लिएको छ र विगत ६ घण्टादेखि १२ किलोमिटर प्रतिघण्टाको गतिमा उत्तर–पश्चिम दिशामा अगाडि बढ्दै गइरहेको छ ।’ उनले भनेका छन् ।

दाना आँधी अहिले मध्य र उत्तर–पश्चिम बंगालको खाडीमा ओडिशाको पराद्वीपबाट २६० किलोमिटर दक्षिण–पश्चिममा रहेको बताइएको छ । यो उत्तरपश्चिमबाट उत्तरी ओडिशा र पश्चिम बंगालतर्फ सर्ने सम्भावना रहेको बताइएको छ । आँधीले बिहीबार राति तटीय क्षेत्रमा ठूलो चक्रवाती आँधी आउन सक्ने अनुमान गरिएको छ । यस अवधिमा यसको गति १०० देखि ११० किलोमिटर प्रतिघण्टा हुने भनिएको छ ।

मयुरभञ्ज, भद्रक, बालेश्वर, केन्द्रपारा, जाजपुर, जगतसिंहपुर, कटकमा भारी वर्षासम्बन्धी रेड अलर्ट जारी गरिएको छ । पुरी, खोर्दा, नयागढ, ढेनकनाल र केन्दोझार जिल्लामा ओरेन्ज अलर्ट जारी गरिएको छ । पश्चिम बंगाल सरकारले नौ जिल्लाका सबै विद्यालय बन्द राख्न निर्देशन दिएको छ ।

जिल्ला प्रशासनले माछा मार्नेहरूलाई समुन्द्रमा नजान आग्रह गरेको छ । समुन्द्रमा गएका मछुवाहरूलाई फिर्ता बोलाइएको छ । तटीय क्षेत्रमा माइकमार्फत सर्वसाधारणलाई सचेत गराइएको छ । ओडिशाको प्रसिद्ध पर्यटकीय गन्तव्य पुरीबाट मंगलबार पर्यटकलाई बाहिर निकालिएको छ । पहिले नै बुकिङ गरिसकेका पर्यटकहरूलाई पुरीमा प्रवेश निषेध गरिएको छ । प्रदेशका १४ जिल्लाका सबै विद्यालय २३ अक्टोबरदेखि २५ अक्टोबरसम्म बन्द रहनेछन् । दानालाई ध्यानमा राख्दै राष्ट्रपति द्रौपदी मुर्मुको भ्रमण पनि स्थगित गरिएको छ ।