मनास्लुमा सर्वाधिक पर्यटक

पोखरा ।
गोरखाको मनास्लु क्षेत्रमा अहिलेसम्मकै उच्च सङ्ख्यामा पर्यटक पुगेका छन् । आर्थिक वर्ष २०८०/८१ मा ९ हजार ७ सय ८२ विदेशी पर्यटकले एमक्यापको भ्रमण गरेका हुन् । अघिल्लो वर्ष २०७९/८० मा ७ हजार ७ सय ५ पर्यटक मनासलु गएका थिए ।

कोरोना र अन्य विभिन्न कारणले त्यसअघिका वर्षहरूमा उल्लेख्य उपस्थिति छैन । २०७८/७९ मा २ हजार २ सय ८४ जनाले मात्रै मनास्लु क्षेत्रको भ्रमण गरेका थिए ।

पछिल्ला वर्षहरूमा पर्यटकको आगमन बढ्दै गएको एमक्यापका प्रमुख सन्तोष शेरचनले जानकारी दिए । ‘१० हजार पर्यटक आउँछन् भन्ने हाम्रो लक्ष्य थियो । करिब ९८ प्रतिशत प्रगति हासिल भएको छ,’ उनले भने, ‘यो वर्ष १५ हजार पर्यटक भित्र्याउने योजना छ । सबैको साथ पाइयो भने लक्ष्य प्राप्त हुन्छ ।’ कोरोनाकालका ४ वर्षमा पर्यटक लगभग शून्यप्रायः थियो ।

आर्थिक वर्ष २०७७/०७८ मा सबैभन्दा कम १ सय ९४ जना पुगेका थिए भने, २०७६/७७ मा ५ हजार ३ सय ३८ र २०७५/७६ मा ७ हजार ६ सय ५५ जना गएका तथ्याङ्क छ । मनास्लु पनि निषेधित क्षेत्र हो । स्थानीयहरूले पर्यटकको सङ्ख्या बढाउनका लागि निषेधित क्षेत्रबाट हटाउनुपर्ने आवाज उठाउँदै आएका छन् । तर कार्यान्वयन भएको छैन । मनास्लु प्रवेश गर्न सार्क राष्ट्रका पर्यटकले प्रति व्यक्ति एक हजार र अन्य राष्ट्रका पर्यटकले तीन हजार रुपैयाँ बुझाउनुपर्छ ।

यसबाहेक चुम र नुब्री प्रवेशमा छुट्टै रकम तिनुपर्ने शेरचनले सुनाए । चुमभ्यालीमा जान एक साताका लागि सिजनका बेला प्रतिव्यक्ति ५० डलर र अन्य समयमा २५ डलर तिर्नुपर्छ । नुब्री जानका लागि सिजनमा ७० डलर र सामान्य समयमा ३५ डलर बुझाउनुपर्ने शेरचनले बताए । त्यसबाहेक प्रत्येक दिन भ्रमण थप्दा रकम पनि थप्नुपर्छ ।