अविरल बर्षाको प्रभावः पाल्पाका विभिन्न स्थानमा पहिरो, सिद्धार्थ राजमार्ग अवरुद्ध

बुटवल ।
पाल्पा सडकखण्डको विभिन्न स्थानमा पहिरो झर्दा शनिवार बिहानैदेखि गाडी चल्न सकेका छैनन् । पाल्पाको तिनाउ गाउँपालिका–३ का धेरै स्थानमा पहिरो झरेको छ ।

राजमार्गको दोभान सिद्धबाबा खण्डको ठूलो झरना नजिकै ढुंगा सहितको पहिरो खसेको छ । निरन्तर पानी परिरहेकाले पहिरो सफा गर्न नसकिएको दोभान प्रहरी चौकीले जनाएको छ ।

राजमार्गअन्तर्गत माथागढी गाउँपालिका–१ चिदीपानी धैरेनीमा लेदो सहितको पहिरो खसेको छ । रातिदेखि परेको अविरल वर्षाका कारण गेग्रान सहितको पहिरोले राजमार्ग अवरुद्ध भएको जिल्ला ट्राफिक प्रहरी कार्यालय पाल्पाका प्रमुख दामोदर मल्लले बताए ।

तानसेनदेखि गुल्मी जाने सडकको ढुंगाखानी र सम्मोबारी नजिक पहिरो खसेर सडक अवरुद्ध भएको प्रहरीले जनाएको छ ।