जारी कपिलवस्तु महोत्सवमा आज गायक प्रकाश सपुतको प्रस्तुति रहने

मायादेवी अनलाइन, बाणगंगा ।
मंगलबार माघ १७ गतेदेखि सुरु भएको १३ औं कपिलवस्तु महोत्सवमा आज चर्चित गायक प्रकाश सपुतको प्रस्तुति रहने भएको छ ।

महोत्सवको आज चौथो दिन गायक सुपतसंगै लोक तथा दोहोरी गायिका सपना गाहाको पनि प्रस्तुति रहने महोत्सव आयोजक संस्था कपिलवस्तु उद्योग बाणिज्य संघका महासचिव मनोज पौडेलले बताए ।

गायक सपुत पछिल्लो समय चर्चित छन् । उनका गलबन्दी, बोलमाया, फुटेको चुरा, मेरो पनि हैनर यो देश, दोहोरी व्याटल लगायतका गीत चर्चित छन् ।

महोत्सवको तेस्रो दिन पप गायक कमल खत्री लगायतको प्रस्तुति रहेको थियो भने दोस्रो दिन गायक पशुपति शर्माले दर्शक नचाएका थिए ।

महोत्सवमा विहीबार पाँच हजार दर्शकले अवलोकन गरेको र करिब तीन लाखको आर्थिक कारोबार भएको महोत्सवका संयोजक समेत रहेका कपिलवस्तु उद्योग बाणिज्य संघका अध्यक्ष डोलकराम घिमिरेले जानकारी दिए ।

‘सक्षम व्यवसायी, समुन्नत राष्ट्र र आत्मनिर्भर अर्थतन्त्र’ भन्ने मूल नाराका साथ बाणगंगाको जितपुर बुद्धरंगशालामा आयोजित महोत्सव माघ २९ गतेसम्म चल्ने छ ।