१३ औं कपिलवस्तु महोत्सवमा स्टल बुकिङ्गको काम तिव्र

कपिलवस्तु ।

१३ औं कपिलवस्तु महोत्सवमा स्टल बुकिङ्गको कामलाई तिव्रता दिईएको छ ।

यही माघ १७ गतेदेखि २९ गतेसम्म १३ औं कपिलवस्तु महोत्सव एवम् कृषि, पर्यटन तथा औद्योगिक प्रदर्शनी हुन लागेको हो । “सक्षम व्यवसायी, समुन्नत राष्ट्र र आत्मनिर्भर अर्थतन्त्र” भन्ने मूल नाराका साथ महोत्सव बाणगंगा ४ स्थित बुद्ध रंगशालामा हुदैं छ ।

महोत्सव उद्घाटन हुन अब ८ दिन मात्र बाँकी छ । स्टल निर्माणको काम सकिएर स्टल बुकिङ्गको काम धमाधम भइरहेको स्टल संयोजक मदन पौडेलले जानकारी दिए । औद्योगिक तथा व्यवसायिक वस्तु तथा सेवाहरुको विक्रि तथा प्रवद्र्धनको उद्देश्य राखि स्टल बुकिङ्गको काम भइरहेको उनले बताए ।

‘स्टलमा विशेष गरी स्थानीय उत्पादनलाई प्राथमिकता दिईन्छ ।,’ उनले भने, ‘यस क्षेत्रका उद्योगी व्यवसायीलाई राहत दिलाउन महोत्सवले महत्वपूर्ण भूमिका खेल्ने छ ।’ महोत्सवमा करिब ३ सय स्टल रहने जानकारी दिदैं उनले हालसम्म करिब २ सय स्टल बुकिङ्ग भएको बताए । ‘महोत्सब नाफा मात्रै कमाउने थलोको रुपमा होइन, स्थानीय उत्पादनलाई प्रोत्साहन गर्ने हाम्रो निती हो ।,’ उनले भने ।

उनले संकटमा परेको अर्थतन्त्रलाई माथि उठाउन महोत्सव महत्वपूर्ण सावित हुने दाबी गरे । यस क्षेत्रको समग्र पहिचान झल्किने गरि महोत्सव स्थलमा पुरातात्विक सम्पदा, धार्मिक, पर्यटकीयस्थलको प्रवर्द्धन गर्ने गरि स्टलहरुको काम भइरहेको उनले बताए ।

उनले यस क्षेत्रको उद्योग, व्यापार, पर्यटन, भेषभूषा, कला, संस्कृति, ऐतिहासिक स्थलको संरक्षण तथा प्रवद्र्धन गर्ने गरी स्टलहरु स्थल तथा महोत्सव स्थल सौन्दर्यीकरणको काम भइरहेको बताए ।