शिवराजको खरेन्द्रपुर चोकमा पृथ्वीनारायणको शालिक शिलान्यास

मायादेवी अनलाइन, चन्द्रौटा ।
कपिलवस्तु शिवराज नगरपालिकाको खरेन्द्रपुरमा पृथ्वीनारायण शाहको शालिक शिलान्यास गरिएको छ ।

शाहको ३ सय १ औं जन्मदिनको अवसर पारेर खरेन्द्रपुर चोकमा शालिकको शिलान्यास गरिएको हो ।

लुम्बिनी प्रदेशका सांसद अर्जुन केसी र शिवराज नगरपालिकाका मेयर अजय थापाले संयुक्त रुपमा शालिकको शिलान्यास गरेका छन् ।

शिवराजका मेयर थापाको सक्रियतामा बन्न लागेको शालिक छिट्टै बनाउने लक्ष्य छ ।

विसं १७७९ पुस २७ गते गोरखामा राजा नरभूपाल शाह र रानी कौशल्यावतीका कोखबाट पृथ्वीनारायण शाहको जन्म भएको थियो । विसं १७९९ चैत २५ गते पृथ्वीनारायण शाह राजा हुनुभएको थियो । त्यसअघि नेपाल ५२ राज्यमा विभाजित थियो । पृथ्वीनारायण राजा भएपछि पूर्वमा टिस्टादेखि पश्चिममा चेपे नदीसम्म नेपालको सीमा विस्तार गर्न उहाँ सफल हुनुभएको थियो । उहाँको योगदान नेपाली समाजले सम्झिरहेको छ ।