थर्काउँदै घिमिरेले भने- धनी हुन हो, सांसद र मन्त्री बन्न मरिहत्ते गर्ने ?

मायादेवी अनलाइ, जितपुर ।

कपिलवस्तुको निर्वाचन क्षेत्र नम्बर १ ‘१’ मा वाम-लोकतान्त्रिक गठबन्धनबाट प्रदेश सभा सदस्य पदमा उम्मेदवार रहेका डोलकराम घिमिरेले सांसद र मन्त्री भएर जीवनशैली बदल्ने प्रवृत्तिविरुद्ध आक्रोश पोखेका छन् ।

जेसिज कपिलवस्तुले चार नम्बरमा आयोजना गरेको ककस कार्यक्रममा आफ्नो भनाई राख्दै घिमिरेले चुनाव जितेपछि सांसद र मन्त्री बनेका अधिकांसको जीवनशैली फेरिएको भन्दै आफूले त्यसो नगर्ने बताए ।

चुनाव जितेपछि आफ्नो मुल मुद्धा सम्पत्ति शुद्धिकरण हुने बताउँदै भ्रष्टाचार गर्नेमाथि सडक र सदनबाट उत्रने उनको दावी छ ।

एकपटक सांसद बनेकाहरुलाई मंचमा देखाउँदै घिमिरेले प्रश्न गरे ‘२०४६ सालपछि चुनाव जितेका सबै नेता र मन्त्री कसरी धनी भए ? चप्पल पड्काएर हिँड्नेहरु कसरी गाडी चढ्ने भए ? म किसानको छोरो हुँ, ठुला कुरा गर्दिनँ, म भ्रष्टाचार गर्दिनँ र भ्रष्टाचारीलाई छोड्दिनँ । चुनाव जितेर पनि म यस्तै हुने छु ।’

मंचमा एक पटक सांसद भइसकेका आफ्ना प्रत्यासी विष्णु पन्थी, बलराम अधिकारी र चक्रपाणी खनाल थिए ।

यसअघि चुनाव जित्नेहरुले आफ्नो क्षेत्रको सन्तुलित विकास गर्न नसकेको उनले बताए ।

‘हामी चुनाव जितेर उत्तरमा रमाएछौँ, चुनावी प्रचारमा दक्षिणमा जाँदा विजोग रहेछ । एउटा गाउँबाट अर्को गाउँ जाने बाटो रहेनछ । चुनाव जितेकाहरुले के गरेछन् । एउटा सांसद र मन्त्रीको काम आफ्नो क्षेत्रको समानुपातिक विकास गर्नु हो, गफमा विकास देखाउने होइन’, उनले भने ।

चुनाव जितेपछि शिक्षा, स्वास्थ्य र सिँचाई र भौतिक पूर्वधारमा राम्रो काम गर्नुपर्ने आवश्यकता रहेको उनले बताए ।