लुम्बिनीका पर्यटकीय क्षेत्रको पहिचान र प्रवर्द्धनका लागि अभियान सुरु

बुटवल ।

पर्यटन विकास परिषद् लुम्बिनीले लुम्बिनीको पर्यटकीय क्षेत्रको पहिचान र प्रवर्द्धनका लागि अभियान सुरु गरेको छ । अभियान अन्तर्गत प्रदेशको पर्यटन विकासको लागि प्रदेशभित्र रहेका १२ वटा जिल्लाका पर्यटकीय स्थलको पहिचान गरी स्थानीय सरकारसँग पनि सहकार्य गरेर ती स्थलको प्रवर्द्धन गरिने परिषद्का कार्यकारी निर्देशक रामु जोशीले बताए ।

अभियान अन्तर्गत परिषद्ले पहिलो चरणमा हालै गुल्मी र अर्घखाँचीमा तीन दिने अवलोकन भ्रमण गरेको छ । भ्रमणमा परिषद्ले स्थानीय जनप्रतिनिधि तथा सञ्चारकर्मीसहित सरोकारवालाहरुसँग अन्तरक्रिया तथा छलफल गरेको निर्देशक जोशीले बताए ।

उनले भने ‘हामी अहिले पहिलो चरणमा लुम्बिनी प्रदेशका सबै जिल्लाका पर्यटकीय स्थलको पहिचान गर्ने र ती स्थलको प्रवर्द्धनका लागि योजना निर्माण तथा स्थानीय निकायसँग सहकार्य गर्ने अभियानमा छौं । पहिलो चरणमा गुल्मी र अर्घाखाँचीमा रहेका पर्यटकीय स्थलको जानकारी लिएका छौं । यसरी नै अन्य जिल्लामा पनि भ्रमण गरी पर्यटकीय स्थलको पहिचान गरेर प्रवर्द्धनका लागि योजना बनाई कार्यान्वयन गर्नेछौं ।’

भ्रमणमा गुल्मीको रिडीस्थित तीन मुखे झोलुङ्गे पुल,तपोभूमि रेसुङ्गा, विचित्र गुफा र अर्घाखाँचीको नरपानी,सुपा देउराली ,खाँचीकोट लगाएतका पर्यटकीय स्थलको अवलोकन गरेको हो । अवलोकनसँगै परिषद्ले स्थानीय तथा सरोकारवालासँग ती स्थानका बारे जानकारी लिएको परिषद्का सदस्य हरिप्रसाद पोख्रेलले बताए । उनले भने ‘दुई जिल्लाका केहि क्षेत्रको स्थलगत भ्रमणमा हामीले स्थानीय तथा सरोकारवालासँग जानकारी लिएका छौं । यसरीनै आगामी दिनमा अन्य जिल्लाका पर्यटकीय क्षेत्रमा पनि भ्रमण गरी जानकारी लिने छौं ।
लुम्बिनी पर्यटकीय दृष्टिकोणले अथाह सम्भावना रहेको बताउँदै गुल्मी र अर्घाखाँचीमा पनि बाह्य पर्यटक भित्राउन सरोकारवालाले पहल गर्नुपर्ने आवश्यकता रहेको परिषद्का कार्यकारी निर्देशक जोशीले बताए । उनले भने ‘राष्ट्रिय अन्तराष्ट्रिय रुपमै लुम्बिनी पर्यटकीय दृष्टिकोणले चर्चामा छ । तर, अब लुम्बिनी प्रदेशका सबै जिल्लाका पर्यटकीय क्षेत्रमा बाह्य पर्यटकलाई पनि पुर्याउन आवश्यक छ । गुल्मीमा रहको रेसुङ्गा,विचित्र गुफा, अर्घाखाँचीमा रहेको नरपानी,सुपा देउराली जस्ता स्थानमा पर्यटक पुर्याउन सिमा नाकादेखि प्रचार तथा प्रवर्द्धन गर्नु पर्दछ । यसका लागि हामी सरोकारवालासँग सहजीकरण तथा सहकार्य गरेर अगाडि बढ्ने छौं।’

रुपन्देहीका करिब दर्जन पत्रकारसहित पर्यटकीय भ्रमण गरेको परिषद्ले गुल्मीको रुरु गाउँपालिका र रेसुङ्गा नगरपालिकाका जनप्रतिनिधिहरुसँग त्यहाँको पर्यटकीय अवस्था बारे जानकारी लिएको थियो । साथै परिषद्ले गुल्मीका पत्रकार तथा पर्यटन व्यवसायीहरुसँग पनि छलफल गरेको थियो ।