बुटवलबाट हराएका ३ बालक भारतको महाराष्ट्रमा भेटिए

रुपन्देही ।

बुटवलबाट सम्पर्कविहीन भएका तीन बालक भारतको महाराष्ट्र प्रदेशमा भेटिएका छन् । शुक्रबार विद्यालय जान भनि हिडेका बुटवल उपमहानगरपालिका वडा नं ११ दुर्गानगरका १५ वर्षीय सागर पौडेल, समिर लम्साल र १४ वर्षका प्रदीप पन्थी शुक्रबार बिहान विद्यालय हिंडेपछि विद्यालयमा पनि हाजिर नभएको र घरमा पनि सम्पर्क नभएको परिवारले जनाएका थिए ।

सम्पर्कविहीन भएका मध्ये समिर लम्सालका बुबा भारतमा रहेको र ती सबै बालक उहाँसँग सम्पर्कमा आएको परिवारले खबर दिएको इलाका प्रहरी कार्यालय बुटवलका प्रमुख ठगबहादुर केसीले ग्लोबल आवाजलाई जानकारी दिए । बालकहरु भेटिएको परिवारले जानकारी दिए पनि उनीहरु आफै गएका हुन वा अरु कसैले लगेको हो भन्ने खुल्न बाँकी रहेको केसीले बताए । घटनाका बारेमा प्रहरीले सुक्ष्म रुपमा अनुसन्धान गरिरहेको र बालकलाई कसैले लगेको वा आफै गएको भन्ने खुल्ने बताए ।