बाँकेमा नक्कली विवाह गराई युवकको मिनिबसको प्रयोग गरी हत्या, यसरी खुल्यो रहस्य

बुटवल ।
लुम्बिनी प्रदेशको बाँके कोहलपुरमा एक युवाको इन्सुरेन्सको रकम कुम्ल्याउन हत्या गरेको आरोपमा ६ जनालाई प्रहरीले पक्राउ गरेको छ । २१ वर्षीय सर्जन बिकलाई डिपेन्डेन भिषामा विदेश पठाउने भनि प्रलोभन देखाएर नक्ली विवाह गराई ईन्सुरेन्स गराएर हत्यागरी रकम असुली गरेको पाइएपछि प्रहरीले पक्राउ गरेको हो ।

पक्राउ पर्नेमा बाँके कोहलपुरका सपना मल्ल, सञ्जीव अर्याल, सरदार अहमद खाँ, टोपबहादुर राना, दीपक केसी र ललिता सापकोटा रहेका छन् । सीआईबीले शुक्रबार पत्रकार सम्मेलन गरी उनीहरूलाई सार्वजनिक गरेको हो ।

यो गिरोहले गरिब परिवारका एक युवकलाई डिपेण्डेण्ट भिसामा अस्ट्रेलिया लैजाने भन्दै नक्कली विवाह गराई २ करोड ५० लाख रुपैयाँको बीमा गराएको थियो । नक्कली विवाह गरी इच्छाइएको व्यक्तिको नाममा नक्कली श्रीमतीको नाम राखी बैंक खाता खोलिएको र बीमा गराइएको पाइएको छ ।

वार्षिक आम्दानी २ लाख मात्रै भएका युवकको २ करोड ५० लाख रुपैयाँ बराबरको बीमा गराइएको र ती युवकलाई योजनामै हत्या गरिएको पाइएको छ । हत्यापछि इन्सुरेन्सबाट आएको पैसा गिरोहका सदस्यहरूले बाँडेर लिएका थिए ।

२ करोड ५० लाख रुपैयाँ बराबरको इन्सुरेन्स गराइएका सर्जन बिकको २०७८ वैशाख २ गते बाँकेको कोहलपुरमा मोटरसाइकल दुर्घटनामा परी मृत्यु भयो । मोटरसाइकल चलाउने लाइसेन्ससमेत नभएका बिकलाई टोपबहादुर राना क्षेत्री भन्ने व्यक्तिले चलाएको मिनिबसले ठक्कर दिएपछि बिकको मृत्यु भएको थियो ।