कार र मोटरसाइकल त्रिसुलीमा खस्दा २ जनाको ज्यान गयो

काठमाण्डौ ।

पृथ्वीराजमार्ग अन्तरगत मुग्लिन–आँबुखैरेनी सडक खण्डको डम्पिङमा सडक भासिँदा एउटा कार र दुईवटा मोटरसाईकल मस्र्याङ्दी नदीमा खसेको छ। दुर्घटनामा परी दुई जनाको ज्यान गएको छ भने दुई जना घाइते छन्।

१० च ४६७९ नम्बर कार चालक हेटौँडा उपमहानगरपालिका ६ का ३३ वर्षीय हेमबहादुर भुजेल र ग १५ प २९५३ नम्बरको मोटरसाइकल चालक गोरखा सिरानचोक गाउँपालिका घर भइ आँबुखरैनी गाउँपालिका २ बस्ने ३६ वर्षका केशव घिमिरेको घटनास्थलमै मृत्यु भएको हो।

सोही ठाउँबाट बा ३३ प १०८१ नम्बरको मोटरसाइकल पनि खसेको थियो। चालक सन्दिप घिमिरे र दुर्गामाया घिमिरे समान्य घाइते भएको तनहुँका प्रहरी प्रमुख एसपी राजेन्द्रबाबु रेग्मीले बताए। घाइते दुवै जनाको अवस्था समान्य छ।

दुर्घटनाग्रस्त गाडीको नम्बर प्लेटको आधारमा खोजी गर्दा शसस्त्र प्रहरीको गोताखोर टोलीले नदीभित्रबाट शव निकालेको हो। दुवै शव पानी भित्रबाट निकालिएको एसपी रेग्मीले बताए। शव पोष्र्टमार्टम भइसकेको प्रहरीले जनाएको छ।

पोखरामा यात्रु छाडेर फर्किएको कार र चितनबाट फर्कदैँ गरेकी श्रीमतीलाई लिन आएका घिमिरे दुर्घटनामा परेका हुन्। सवारी जाममा परेकी श्रीमतीलाई लिन आएका उनी श्रीमती भेट्न नपाउँदै चार किलोमिटर पर सडकबाट नदीमा खसे। शुक्रबार बिहान करिब ४ बजेतिर सडक भासिएको र दुर्घटनापनि लगत्तै भएको स्थानीयलाई उदृत गर्दै प्रहरीले जनाएको छ।