बर्दिया ।
पूर्व पश्चिम राजमार्गअन्तर्गत बर्दियाको भुरिगाउँ बजार नजिक सिंहबाहिनी चोकमा ट्रकले ठक्कर दिँदा ई–रिक्सामा सवार एक महिलाको ज्यान गएको छ ।
पश्चिमबाट पूर्वतर्फ जाँदै गरेको रा १ क १८३ नम्बरको ट्रकले भे १ स ९५६२ नम्बरको ई–रिक्सालाई ठक्कर दिँदा एक महिलाको ज्यान गएको हो । ट्रकको ठक्करबाट बर्दिया ठाकुरबाबा नगरपालिका २ रानीपुरकी ४९ वर्षीया पिउली धितालको ज्यान गएको जिल्ला प्रहरी कार्यालय बर्दियाका प्रहरी नायब उपरीक्षक डीएसपी प्रकाश सापकोटाले जानकारी दिनुभयो ।
ट्रकले ई–रिक्सालाई ठक्कर दिएपछि घाइते भएकी महिलालाई तत्काल उद्धार गरि स्थानीय क्लिनिकमा उपचारका लागि लैजाँदै गर्दा बाटोमै ज्यान गएको प्रहरीले जनाएको छ । महिलाको शव पोस्टमार्टमाका लागि सदरमुकाम गुलरियाको जिल्ला अस्पताल लगिएको छ ।
ट्रक चालक दाङको तुलसीपुर उप–महानगरपालिका ४ का वसन्त नेपाली र ई–रिक्सा चालक ठाकुरबाबा नगरपालिका ८ का दीपेन्द्र विकलाई पक्राउ गरी अनुसन्धान भइरहेको प्रहरीले जनाएको छ ।
प्रतिक्रिया