बुटवल ।
नेपाली कांग्रेस लुम्बिनी प्रदेशले प्रदेशभर चुनावी गठबन्धन बनाउन सभापति अमरसिंह पुनको संयोजकत्वमा वार्ता समिति गठन गरेको छ।
कांग्रेसको बुटवलमा सम्पन्न प्रदेश समितिको बैठकले सत्तारुढ दलहरुसँग जिल्लास्तरमा भइरहेको वार्तालाई सघाउँदै गठबन्धन थप बलियो बनाउनका लागि सभापति पुनको संयोजकत्वमा वार्ता समिति बनाएको हो।
समितिको सदस्यमा भरत कुमार शाह, भुवन प्रसाद श्रेष्ठ, राजु खनाल, प्रकाश राना रहेका छन्। बैठकले प्रदेश कार्यसमितिका प्रवक्ता प्रचण्ड बिक्रम न्यौपानेको संयोजकत्वमा एक हजार १०१ जनाको प्रचार प्रसार समिति गठन गर्ने निर्णय गरेको छ। माधव खरेलको संयोजकत्वमा यस्तै अनुशासन समिति गठन गरेको छ। जसमा महेन्द्र पाण्डे, प्रेमलता भट्ट र कृष्ण प्रसाद अधिकारी सदस्य रहेका छन्।
यस्तै महामन्त्री विक्रम खनालको संयोजकत्वमा ५ सदस्यीय घोषणा पत्र लेखन समिति गठन गरेको सभापति पुनले जानकारी दिए। यो समितिको सदस्यहरुको मनोनयन विभिन्न विज्ञता हाँसिल गरेको व्यक्तित्वहरूलाई संयोजकबाट मनोनित गर्ने कांग्रेसले जनाएको छ।
प्रतिक्रिया