कपिलवस्तुमा बहुजन शक्ति पार्टीको राष्ट्रिय महाधिवेशन

कपिलवस्तु ।
बहुजन शक्ति पार्टीका अध्यक्ष एव पूर्वमन्त्री विश्वेन्द्र पासवानले साना दललाई चुनाव चिह्न नदिएर सरकारले गलत काम गरेको गुनासो गरेका छन् । उनले जनताको बलमा संघीयता, गणतन्त्र प्राप्त भए पनि स्थानीय निर्वाचनमा साना दललाई चुनाव चिन्ह नदिएर निरकुंशता लाद्न खोजेको आरोप लगाए ।

कपिलवस्तुको बहादुरगञ्जमा आयोजित पार्टीको छैटौं राष्ट्रिय महाधिवेशन उद्घाटनसत्रलाई सम्बोधन गर्दै अध्यक्ष पासवानले लोकतन्त्रमा चुनाव चिह्न पनि नपाउने अवस्था स्वीकार्य नरहेको बताए । उनले साना पार्टीलाई राखिएको थ्रेसहोल्ड हटाउन कानुन संशोधन गर्न सरकारको ध्यानाकर्षण गराउँदै संविधानले दिएको अधिकार समेत कार्यान्वयन गर्न सरकार असफल बनेको बताए । पूर्ण समानुपातिक व्यवस्था, दलित तथा पिछडिएका समुदायको अधिकार स्थापित नभए ठूलो विद्रोह हुने चेतावनी उनको थियो ।

बहुजन शक्ति पार्टीका वरिष्ठ उपाध्यक्ष रामसुभक हरिजनले अब आउने चुनावमा तराई मधेसका दलित समुदायले सोच विचार गरेर मात्रै मत दिनुपर्ने बताए ।​ बहुजन शक्ति पार्टीका युवा नेता राजेश सक्सेनाले दलित समुदायमाथि सरकारकै संरक्षणमा विभेद भएको आरोप लगाए ।

महाधिवेशनको बन्दसत्र रूपन्देहीको भैरहवामा हुनेछ । छैटौं महाधिवेशनले समावेशिताका सवाल र समसामयिक राजनीतिक विषयमा छलफल गरी शुक्रबार नयाँ नेतृत्व चयन गर्दै सकिने जनाइएको छ ।