भूमिहीन तथा अव्यवस्थित बसोबासीलाई पूर्जा दिन सम्झौता

रुपन्देही ।
रुपन्देहीको तिलोत्तमा नगरपालिकाले भूमिहीन तथा अव्यवस्थित बसोबासीहरुको समस्या समाधान गर्न राष्ट्रिय भूमि आयोगसँग सम्झौता गरेको हो । नगर प्रमुख बासुदेव घिमिरे र प्रमुख प्रशासकीय अधिकृत जीवन ज्ञवालीले आयोगको काठमाडौंस्थित कार्यालयमै पुगेर बुधबार सम्झौता गरेको नगरपालिकाले जनाएको छ । यसैसँगै तिलोत्तमा नगरपालिकामा रहेको बर्षौँदेखिको भूमिसम्बन्धी समस्या समाधान हुने नगरपालिकाले अपेक्षा लिएको छ ।

यसअघि तिलोत्तमा नगरपालिकामा भूमि सम्बन्धी समस्या समाधान आयोगमार्फत् भूमिहीन दलित, भूमिहीन सुकुम्बासी, अव्यवस्थित बसोबासीहरुको लगत संकलन भएको थियो ।

अव संकलित तथ्यांक इन्ट्री गर्ने र जग्गा नापजाँचको लागि कन्ट्रोल पोइन्ट राख्ने कार्य जारी राखिने छ ।

नगर प्रमुख घिमिरेले वर्तमान सरकारले गठन गरेको राष्ट्रिय भूमि आयोगसँग कार्यसम्झौता गरेसँगै अब प्रक्रिया अनुसार भूमि समस्या समाधानको काम अघि बढ्ने बताए ।

यो नगरपालिकामा झण्डै आठ हजार जनाले भूमि सम्बन्धी समस्या समाधान आयोगको लगत संकलन फारम भरेका छन् ।

नयाँ सम्झौताअनुसार आयोगले भूमिहिनलाई लालपूर्जा दिन आवश्यक प्रक्रिया अघि बढाउनेछ भने नगरपालिकाले जनशक्ति तथा अन्य व्यवस्थापकीय कार्य गर्ने जनाइएको छ ।