रुपन्देहीमा मोटरसाइकल दुर्घटना हुँदा दुई जनाको ज्यान गयो

रुपन्देही ।

रुपन्देहीको बुटवल उपमहानगरपालिका–१२ मिलनपार्कमा मोटरसाइकल दुर्घटना हुँदा दुई जनाको ज्यान गएको छ । एक जना घाइते भएका छन् ।

तीन जना चढेको लु ६० प ३६५२ नम्बरको मोटरसाइकल अनियन्त्रित भइ पर्खालमा ठोक्किँदा गैडहवा गाउँपालिका–९ हात्तीबजारका २० वर्षीय प्रेम रुचाल र २० वर्षीय राहुल थापाको ज्यान गएको हो ।

प्रदेश ट्राफिक प्रहरी कार्यालय बुटवलका प्रवक्ता डीएसपी मोहन खाँडले दुवै जनाको उपचारका क्रममा बुटवलमा रहेको लुम्बिनी प्रादेशिक अस्पतालमा ज्यान गएको जानकारी दिनुभयो ।

दुर्घटनामा गम्भीर घाइते भएका मोटरसाइकल चालक रुपन्देहीकै २१ वर्षीय विमल रानाको लुम्बिनी प्रादेशिक अस्पताल बुटवलमा उपचार भइरहेको छ ।

मोटरसाइकल अनियन्त्रित भएपछि सडकबाट ३० मिटर पर रहेको पर्खालमा ठोक्किएर दुर्घटना भएको प्रहरीले जनाएको छ ।