पाल्पामा विहे भोज मनाउँदै नाच्ने क्रममा खेतमा खसेका युवाको मृत्यु

बुटवल ।

पाल्पाको माथागढी गाउँपालिका ७ मौलाथरका एक युवाले विहेको भोजमा नाच्नेक्रममा लडेर ज्यान गुमाएका छन् । नाचगान गर्ने क्रममा करिब ७ मिटर अग्लो ढिकबाट खेतमा खसेका ४० वर्षीय टलराज नेपालीको शनिबार मृत्यु भएको प्रहरीले जनाएको छ ।

माथागढी(७ धनुवा टोलका स्थानीय कृष्ण बहादुर रानाको छोरीको बिहे खान गएका उनी शुक्रबार नाचगानको क्रममा लड्न गई घाइते भएका थिए । जिल्ला प्रहरी कार्यालय पाल्पाका अनुसार खेतमा खसेपछि उनलाई खसेको ठाउँबाट उठाई नाचगान गर्ने ठाउँ नजिकै सुताएर राखेकोमा आज विहान मृत्यु भएको थियो । घटना लगत्तै खबर पाएको प्रहरी चौकी माथा तथा जिल्ला प्रहरी कार्यालय पाल्पाको टोलीले आवश्यक मुचुल्का संकलन गरि अनुसन्धान अघि बढाएको छ ।