बाटोमा लडेर वडा सदस्यको मृत्यु

रुकुम पूर्व ।

पैदल हिँड्ने क्रममा बाटोमा लडेका सिस्ने गाउँपालिका–२ का सदस्य धनबहादुर पुनको मृत्यु भएको छ ।

लडेर घाइते भएका पुनलाई थप उपचारको लागि बाँकेको नेपालगन्ज लैजाने क्रममा रुकुम पश्चिमको त्रिवेणी गाउँपालिकास्थित झुल्नेटा बजारमा मृत्यु भएको वडाध्यक्ष जीवन केसीले जानकारी दिए ।

बिहीबार बिहान लडेका पुनको शुक्रबार बिहान ३ बजेतिर मृत्यु भएको हो । २ नम्बर वडाको छिपखोला घरबाट रुकुमकोटतर्फ आउँदै गरेका बेला ४ नम्बर वडाको दादिङ फारुलामा वडा सदस्य पुन लडेका थिए ।

पुनको जिल्ला अस्पतालमा सामान्य उपचार गरिएको थियो । त्यसपछि जिल्ला अस्पतालले उनलाई नेपालगन्ज लैजान भनेको थियो । नेकपा (माओवादी केन्द्र)बाट उम्मेदवार बनेका पुनका श्रीमती र एक छोरा छन् ।