चार प्रदेशमा वर्षाको सम्भावना, हिमपात पनि हुन सक्ने

काठमाडौं ।
देशभर आजको मौसममा बदली रहने जल तथा मौसम पूर्वानुमान महाशाखाले जनाएको छ । सुदूरपश्चिम, कर्णाली, लुम्बिनी र गण्डकी प्रदेशका भू-भागहरूमा सामान्य बदली तथा बाँकी प्रदेशका भू-भागहरूमा आंशिकदेखि सामान्य बदली रहने मौसमविद्ले जानकारी दिएका छन् ।

सुदूरपश्चिम, कर्णाली, लुम्बिनी र गण्डकी प्रदेशका एक–दुई स्थानमा हल्का वर्षाको पनि सम्भावना रहेको महाशाखाले जनाएको छ । यस्तै देशका उच्च पहाडी तथा हिमाली भू-भागका थोरै स्थानहरूमा हल्कादेखि मध्यम हिमपातको सम्भावना रहेको छ ।

आज राति पनि सुदूरपश्चिम, कर्णाली, लुम्बिनी र गण्डकी प्रदेशका भू-भागहरूमा सामान्य बदली तथा अन्य प्रदेशका भू-भागहरूमा आंशिकदेखि सामान्य बदली रहने छ ।

कर्णाली र गण्डकी प्रदेशका केही स्थानमा राति वर्षाको पनि सम्भावना छ । यस्तै उच्च पहाडी तथा हिमाली भू-भागका थोरै स्थानहरूमा हल्कादेखि मध्यम हिमपातको सम्भावना रहेको छ ।