कपिलवस्तुमा माओवादी केन्द्रले आज वडा सम्मेलन गर्दै

मायादेवी अनलाइन, वाणगंगा ।
नेकपा (माओवादी केन्द्र) कपिलवस्तुले आज जिल्लाका ९६ वडामा वडा सम्मेलन गर्दैछ । देशभरका सबै वडामा आज वडा सम्मेलन गर्न लागेको माओवादी केन्द्रले आज जिल्लामा पनि वडा सम्मेलन गर्न लागेको हो ।

माओवादी केन्द्रका जिल्ला संयोजक विष्णु शाहका अनुसार सबै पालिकाका वडाहरूमा सम्मेलनको लागि जिम्मेवारी प्रदान गरिएको बताउनुभयो । सबै वडामा व्यापक छलफल गरी जुझारु, क्रान्तिकारी नेतृत्व चयन गर्न सबैलाई आग्रह गर्नुभएको छ ।

नेतृत्व चयनमा विशेष ध्यान दिँदै कर्मठ नेतृत्व ल्याउनुपर्ने भएकाले वडाका सदस्यहरूलाई विशेष छलफल गर्न आग्रह गर्नुभयो । वडा सम्मेलनमा उत्साहजनक सहभागिता हुने अपेक्षा गर्दै सम्मेलनको सफलताको कामना समेत गर्नुभयो । कपिलवस्तुमा ८ हजार माओवादी केन्द्रका कृयाशिल सदस्य रहेका छन् ।