दाङ ।
ड्युटी सकेर घर फर्किंदै गरेका सशस्त्र प्रहरीका एक जना हवल्दारको मोटरसाइकल दुर्घटनामा परेर मृत्यु भएको छ । दाङको तुलसीपुर उपमहानगरपालिका वडा नम्बर १० बन्गैका ३५ वर्षीय कैलास भण्डारीको दुर्घटनामा परेर गए राति मृत्यु भएको प्रहरीले जनाएको छ ।
भण्डारी सशस्त्र प्रहरी वेश तुलसीपुरमा कार्यरत थिए । दुर्घटनामा परेपछि उनलाई उपचार गर्न अस्पताल लगिएकोमा त्यही उनको मृत्यु भएको प्रहरीले जनाएको छ ।
इलाका प्रहरी कार्यालय तुलसीपुरका प्रहरी नायब उपरीक्षक श्यामु अर्यालका अनुसार तुलसीपुर १० चैलाहीका ३६ वर्षीय लीलाधर खड्का भने घाइते छन्। उनलाई थप उपचार गर्न नेपालगञ्ज मेडिकल कलेज लगिएको छ ।
उनको अवस्था सामान्य छ। मोटरसाइकलमा सवार अर्का एक जना भने उपचारपछि घर फर्किसकेका छन् ।
तुलसीपुर बजारबाट बन्गैस्थित गाउँ जाँदै गरेको रा ४ प ६०५८ नम्बरको मोटरसाइकलमा तीन जना सवार थिए ।
मोटरसाइकल भण्डारीले चलाएका थिए । भण्डारीको शव पोस्टमार्टमका लागि राप्ति प्रादेशिक अस्पतालमा राखिएको छ ।
प्रतिक्रिया