रियल म्याड्रिडको जित, चम्किए बेन्जेमा र भिनि

एजेन्सी । फ्रान्सेली फरवार्ड करिम बेन्जेमाको दुई गोल र ब्राजिली विंगर भिनिसियस जुनियरको दुई असिस्टमा स्पेनिस क्लब रियल म्याड्रिडले युइयफए च्याम्पियन्स लिगमा युक्रेनी क्लब साख्तर डोनेस्कलाई पराजित गरेको छ ।

फेरि एकपटक करिम बेन्जेमा र भिनिसियस जुनियरको समन्वय मिलेपछि रियलले घरेलु मैदानमा साख्तरलाई २–१ ले पराजित गरेको हो । दुवै गोलमा भिनिसियले असिस्ट दिए । साख्तरका फर्नान्डोले एक गोल फर्काए ।

सान्टियागो बर्नबेउमा बुधबार राति भएको खेलमा रियलले खेलको १४औं मिनेटमा बेन्जेमाको गोलबाट अग्रता लिएको थियो । उनले भिनिसियस जुनियरको पासमा गोल गरेका थिए । ३९औं मिनेटमा फर्नान्डोले गोल गर्दै खेललाई १–१ गोलको बराबरीमा ल्याए । उनले एलान प्याट्रिकको पासमा गोल गरेका थिए । ६१औं मिनेटमा करिम बेन्जेमाले भिनिसियसकै पासमा गोल गर्दै रियललाई जित दिलाए ।

जितपछि रियल ४ खेलबाट ९ अंक जोडेर शीर्षस्थानमा उक्लिएको छ । पराजित साख्तर १ अंक जोडेर पुछारमा रहेको छ । यही समूह ‘डी’ को अर्को खेलमा शीर्षस्थानमा रहेको मोल्दोभाको एफसी सेरिफ इटालियन क्लब इन्टर मिलानसँग पराजित भएपछि रियल शीर्षस्थानमा उक्लन सफल भएको हो ।

इन्टर मिलानले सेरिफलाई उसकै मैदानमा ३–१ ले पराजित गरेको छ । इन्टर मिलानको जितमा मार्सेलो ब्रोजोभिक, मिलान स्क्रिनिएर र एलेक्सिस सान्चेजले गोल गरे । सेरिफका एडमा ट्राओरेले एक गोल फर्काए । जितपछि इन्टर ४ खेलबाट ७ अंक जोडेर दोस्रो स्थानमा उक्लदा सेरिफ ६ अंक जोडेर तेस्रो स्थानमा झरेको छ ।