शोकमा बाणगंगाको गिरी परिवार, सन्चो हुन्छ भन्दाभन्दै दशैँमा उनको मृत्युको खबर आयो

मायादेवी अनलाइन, चारनम्बर ।

सडक दुर्घटनामा परी उपचाररत कपिलवस्तुको बाणगंगाकी कक्षा १२ मा पढ्ने विद्यार्थीको निधन भएको छ । टाउकोमा गहिरो चोट लागि बुटवलमा उपचार भइरहेको अवस्थामा वडा नम्बर ८ बोडगाउँकी अस्मिता गिरीको निधन भएको हो । उनी बाणगंगा मावि लौगाईमा कक्षा १२ मा पढ्थीन् ।

आज भन्दा ४ दिन अगाडी बोडगाउँमा सडकमा हिँडिरहेको अवस्थामा कुखुरा बोक्ने गाडीले गिरीलाई ठक्कर दिएको थियो । त्यसपछि उनी गम्भिर घाइते भएकी थिइन् । ठक्कर दिएपछि पनि गाडीले उनलाई लतारेको कारण उनी थप गम्भिर बनेकी प्रत्यक्षदर्शीले मायादेवीलाई जानकारी दिएका छन् ।

सन्चो हुने आशामा बसेका गिरी परिवार अकस्मात् अस्मिताको निधनको खबर विहीबार आएपछि मुर्छित भएका छन् । उनको टाउकोमा रगत जमेको थियो । उनको निधनले बाणगंगा मावि लौगाई शोकमग्न भएको विद्यालयले जनाएको छ भने, बोडगाउँबासी नै यस खबरले दुखी भएका छन् ।