शिवराज ५ घर भएका बेपत्ता अब्दुल मृत भेटिए, हत्या भएको परिवारको आशंका

चन्द्रौटा ।
पाँच दिन देखि बेपत्ता भएका अब्दुल हुसेन मुसलमान (छोटकाउ) मृत फेला परेका छन् । गत आइतबार विहान देखि बेपत्ता भएका मुसलमान बिहीवार शिवराज २ हरहट्टिमा मृत अवस्थामा भेटिएका हुन् । मुसलमानको घर कपिलवस्तुको शिवराज नगरपालिका ५ खैरी हो । ५७ बर्षीय उनको टाउको गाडिएको, हातमा चोट लागेको अवस्थामा सुरही नदी किनारमा शव भेटिएको जनाइएको छ ।

घरबाट निस्केका ३ दिन वितिसक्दा घर नआएपछि मुसलमानको परिवारले खोजतलास गर्दा खैरी गाउँ नजिकै पुर्वपश्चिम राजमार्ग छेउमै अब्दुलको चप्पल भेटिएको थियो । चप्पल भेटिएको ठाउँमा अब्दुल घरबाट निस्केकै दिन कार दुर्घटना भएको थियो ।

लु १ ज ३३१३ नम्बरको कार दुर्घटना भएकै ठाउँमा अब्दुलको चप्पल भेटिनु र शव नजिकै सवारीको डाम देखिएकोले घटना रहस्मय बनेको छ ।

स्थानीयले भने उक्त कारले मुसलमानलाई ठक्कर दिएपछि खोला नजिकै लगेर फालेको आंशका गरेका छन् । दुर्घटनास्थलमा चप्पल भेटिनु र शव नजिकै गाडीका डामहरु देखिनुले दुर्घटनालाई लुकाउन शव फालेको हुनसक्ने स्थानीय रहिस शाहले बताउनुभयो ।

वडा प्रहरी कार्यलय चन्द्रौटाले कार चालक विरु कुवँर सहित चार जना पक्राउ गरि अनुसन्धान भइरहेको प्रहरी निरीक्षक शकंर प्रसाद आचार्यले जानकारी दिनुभयो । शवलाई पोष्टमार्टमको लागि जिल्ला अस्पताल कपिलवस्तु लगिएको छ ।