दाङ ।
बुटवलबाट साढे २८ किलो लागुऔषध चरेससहित २ जना व्यक्तिलाई प्रहरीले पक्राउ गरेको छ। पक्राउ पर्नेहरूमा बाग्लुङ बढिगाउँ गाउँपालिका ८ बस्ने ३६ वर्षीय रोहित राना र सोही ठाउँका ६३ वर्षीय जीवन पुन रहेको लुम्बिनी प्रदेश प्रहरी कार्यालय दाङले जनाएको छ।
शुक्रबार साँझ करिब सवा ६ बजेतिर बुटवल उपमहानगरपालिका ११ देविनगरस्थित नमस्ते पथ केएफसी पिज्जा हबमा चरेसको कारोबार भइरहेको भन्ने सूचनाको आधारमा लुम्बिनी प्रदेश अनुसन्धान समूह (आरआइटी) टोलीले २८.५ किलो लागुऔषध चरेससहित उनीहरूलाई पक्राउ गरेको कार्यालयले जनाएको छ।
साथै प्रहरीले लु २५ प ६५४४ नम्बरको स्कुटर पनि नियन्त्रणमा लिएको जनाएको छ। पक्राउ परेकामाथि थप अनुसन्धान कार्य भइरहेको प्रहरीले जनाएको छ।
यता, दाङमा प्रहरीले ब्राउन सुगरसहित २ जनालाई पक्राउ गरेका छ। पक्राउ पर्नेमा घोराही उपमहानगरपालिका १५ बस्ने २९ वर्षीय राकेश बस्नेत र सोही ठाउँका २७ वर्षीय अंकित रावत रहेको जिल्ला प्रहरी कार्यालय दाङले जनाएको छ।
बस्नेतले आफ्नै घरकोठामा अवैध लागुऔषध ब्राउन सुगर कारोबार गरिरहेको भन्ने गोप्य सूचनाको आधारमा जिप्रकाबाट गएको शुक्रबार दिउँसो साढे ४ बजेतिर उनी सुत्ने कोठाबाट लागुऔषध ब्राउन सुगर २ ग्राम १७० मिलिग्राम र नगद ९ हजार ८ सय समेत फेला पारी बरामद गरिएको जिल्ला प्रहरी कार्यालय दाङका प्रवक्ता एवं डिएसपी मुकुन्दप्रसाद रिजालले जानकारी दिए। बस्नेत र उनीसँगै रहेका रावतलाई पक्राउ गरि थप अनुसन्धान भइरहेको प्रहरीले जनाएको छ।
प्रतिक्रिया