जसपाले आफ्ना मन्त्रीलाई ७ दिने स्पष्टीकरण सोध्यो

काठमाडौं ।
जनता समाजवादी पार्टी (जसपा) ले पार्टीबाट सरकारमा गएका मन्त्रीहरूलाई स्पष्टीकण सोधेको छ। आइतबार सरकारमा गएका सबै मन्त्रीहरूलाई स्पष्टीकरण सोधेको हो।

पार्टीको निर्णयबिना सरकारमा सामेल भएपछि कारबाही प्रक्रिया अघि बढाउनको लागि ७ दिनको स्पष्टीकरण सोधेको अध्यक्ष उपेन्द्र यादवले जानकारी दिए।

उनले भने, ‘पार्टीले सरकारमा जाने कुनै निर्णय गरेकै छैन। तर, उहाँहरु सरकारमा जानुभएको छ। उहाँहरूले जवाफ नफर्काए पार्टीको विधानलाई टेकेर कारबाही प्रक्रिया अघि बढ्छ।’

जसपाको अर्का अध्यक्ष महन्थ ठाकुर पक्षका ११ जना प्रधानमन्त्री केपी शर्मा ओली नेतृत्वको सरकारमा सामेल भएका छन्। ओली सरकारमा जसपाको ९ मन्त्री र २ राज्यमन्त्री छ्न्।

अध्यक्ष ठाकुर पक्ष ओली नेतृत्वको सरकारमा गएपछि अध्यक्ष यादव र संघीय परिषद् अध्यक्ष डा. बाबुराम भट्टराई प्रधानमन्त्री ओली सरकार बहिर्गमनको प्रयासरत छन्।

ठाकुरपक्षले सरकारमा जाने निर्णय गरेपछि जसपाको दुई पक्षले एकअर्का समूहलाई कारबाही गरेको थियो। तर, निर्वाचन आयोगले दुवै पक्षका कारबाहीलाई मान्यता नदिएर साबिककै पदाधिकारीलाई यथावत राखेपछि अध्यक्ष यादवले फेरि स्पष्टीकरण सोधेका हुन्। औपचारिक रूपमा जसपाको विभाजनले वैधानिकता नपाए पनि अनौपचारिक रुपमा विभाजन भइसकेको छ। थाहा खबरबाट