युरो कपका लागि स्पेनी टिमको घोषणा, सर्जियो रामोस परेनन्

काठमाडौं ।
कप्तान सर्जियो रामोस युरो कपका लागि स्पेनको राष्ट्रिय फुटबल टिमबाट बाहिरिएका छन् । चोटका कारण रामोसलाई बाहिर राख्दै युरो कपका लागि स्पेनको राष्ट्रिय टिम घोषणा गरिएको छ ।

टिमबाट बाहिरिएसँगै रामोसले आसन्न युरो कप गुमाउने भएका छन् । रामोस स्पेनका सबैभन्दा अनुभवी खेलाडी हुन् । उनले स्पेनबाट सर्वाधिक एक सय ८० क्याप जितेका छन् । रामोस युरो कप छनोटका १० मध्ये ९ खेलमा मैदान उत्रिएका थिए ।

उनी सन् २००८ मा युरो कप स्पेनले जित्दा टिमका मुख्य सदस्य थिए । स्पेनको टिममा रियलका कुनै पनि खेलाडी अटाएका छैनन् । युरो कप फुटबल जुन ११ देखि जुलाई ११ सम्म हुँदैछ ।