पीएसजीको शानदार जित, नेयमार र एम्बाप्पे चम्किए

एजेन्सी ।

लिग वान फुटबलमा पेरिस सेन्ट जर्मेन (पीएसजी)ले शानदार जित निकालेको छ ।आईतबार राति पीएसजीले घरेलु मैदानमा रिम्सलाई ४–० गोल अन्तरले पराजित गरेको हो ।पीएसजीको जितमा नेयमार र केलियन एम्बाप्पेले उत्कृष्ट प्रर्दशन गरे ।

पीएसजीको जितमा नेयमार, केलियन एम्बाप्पे, मार्कुन्होस र मोईस केनले एक एक गोल गरेका थिए ।खेलमा अग्रता नेयमारले १३ औं मिनेटमा पेनाल्टी गोलमार्फत दिलाए ।२४ औं मिनेटमा एम्बाप्पेले पीएसजीको अग्रता दोब्बर बनाए । ६८ औं मिनेटमा नेयमारको पासलाई सदुपयोग गर्दै मार्कुन्होसले पीएसजीलाई ३–० को स्थितीमा पुर्याएका थिए ।

खेल सकिन एक मिनेट बाँकी छदाँ केनले गोल गर्दै घरेलु टोलीलाई फराकिलो जित दिलाए ।जित सहित पीएसजीले लिग वानको उपाधि सम्भावनालाई जिवितै राखेको छ । उपाधिको छिनोफानो अब अन्तिम खेलले लगाउने छ ।पीएसजी ७९ अंक सहित तालिकाको दोस्रो स्थानमा छ । एक अंक बढी रहेको लिली शीर्ष स्थानमा छ । पीएसजीसंग पराजित रिम्स ४२ अंक सहित तालिकाको १३ औं स्थानमा छ ।

आईतबारनै भएको खेलमा शीर्ष स्थानको लिलीले सेन्ट इटियनसंग गोल रहित बराबरी खेल्दै अंक बाँड्यो । प्राप्त नतिजासंगै लिलीले तालिकामा एक अंकको अग्रता जोगाउन सफल रह्यो । सेन्ट इटियन ४६ अंक सहित तालिकाको ११ औं स्थानमा यथावत छ ।