कोलकत्तालाई हराउँदै बैंगलोर शीर्ष स्थानमा, म्याक्सवेल र डिभिलियर्स चम्किए

एजेन्सी ।

रोयल च्यालेन्जर्स बैंगलोरले ईन्डियन प्रिमियर लिग क्रिकेट (आईपीएल) मा लगातार तेस्रो जित निकालेको छ ।चेन्नईमा आइतबार भएको खेलमा कोलकत्ता नाइट राइडर्सलाई ३९ रनले पराजित गर्दै बैंगलोरले तेस्रो जित निकालेको हो । बैंगलोरले दिएको २ सय ५ रनको लक्ष्यसहित जवाफी ब्याटिङ गरेको कोलकत्ताले २० ओभरमा ८ विकेट गुमाएर १ सय ६६ रन मात्र बनाउन सक्यो ।
कोलकत्ताका लागि आन्द्रे रसेलले सर्वाधिक ३१ रन बनाए ।कप्तान इयान मोर्गन २९ रन जोड्दा शकिब अल हसन २६ रनमा आउट भए । राहुल त्रिपाठीले २५, सुबमन गिलले २१ र नितिश रानाले १८ रन जोडे ।

बैंगलोरका केली जेमिसनले ३ विकेट लिए । यस्तै हर्सल पटेल र युजभेन्द्र चहलले २÷२ विकेट लिए ।यस अघि टस जितेर पहिले ब्याटिङ गरेको बैंगलोरले २० ओभरमा ४ विकेट गुमाएर २ सय ४ रन बनाएको थियो । बैंगलोरका लागि ग्लेन म्याक्सवेल र एबी डी भिलियर्सले अर्धशतकीय इनिङ्स खेले । म्याक्सवेलले ४९ बलमा ९ चौका र ३ छक्कासहित ७८ रन बनाए ।

विस्फोटक ब्याटिङ गरेका डी भिलियर्सले ३४ बलमा ९ चौका र ३ छक्कासहित अविजित रहदै ७६ रन बनाए ।देवदुत पडिकलले २५ रन जोड्दा केली जेमिसनले अविजित ११ रन बनाए ।कप्तान विराट कोहली ५ रनमा आउट भए ।कोलकत्ताका वरुण चक्रवर्तीले २ तथा पाट कुमिन्स र प्रशिद्द कृष्णले १÷१ विकेट लिए ।

जितसँगै बैंगलोर लिगको शीर्ष स्थानमा उक्लिएको छ । बैंगलोरले ३ खेलमा अपराजित रहदै ६ अंक जोडेको छ ।कोलकत्ताको यो दोस्रो हार हो । कोलकत्ताले ३ खेलमा २ अंक जोडेको छ ।