नेदरल्याण्डसले दर्ता गर्‍यो ७–० को शानदार जित

एजेन्सी ।
कतार विश्वकप २०२२ को छनौट अन्तर्गत मंगलबार राति भएको खेलमा नेदरल्याण्डसले शानदार जित दर्ता गरेको छ ।

युरोपेली क्षेत्रको छनौट अन्तर्गत समूह जी मा रहेको नेदरल्याण्डसले जिब्रालटारलाई ७–० ले पराजित गरेको हो । पहिलो हाफमा एक गोल गरेको नेदरल्याण्डसले दोस्रो हाफमा ६ गोल गर्न सफल भएको हो ।

मेम्फिस डिपेले मात्रै दुई गोल गरे । अरु पाँच खेलाडीले एक एक गोल गरेका हुन् । तीन मध्ये दुई खेलमा जित निकालेको नेदरल्याण्डस ६ अंकसहित समूहको दोस्रो स्थानमा छ ।

लात्भियासँग ३–३ को बराबरी खेलेको टर्की सात अंकसहित समूहको शीर्ष स्थानमा छ भने नर्वेसँग १–० ले पराजित भए पनि ६ अंकसहित मोन्टेनेग्रो तेस्रो तथा समान ६ अंकसहित नर्वे चौथो स्थानमा छ ।