कपिलवस्तु उद्योग बाणिज्य संघमा सामाजिक सुरक्षा कोषबारे छलफल

मायादेवी अनलाइन, चारनम्बर ।

कपिलवस्तु उद्योग बाणिज्य संघ र योगदानमा आधारित सामाजिक सुरक्षा कोषबारे अन्तरक्रिया र छलफल भएको छ । संघका अध्यक्ष डोलकराम घिमिरेको अध्यक्षतामा कार्यक्रम सम्पन्न भएको हो ।

संघको कार्यालयमा भएको कार्यक्रममा सामाजिक कोषका निर्देशक कृष्ण अधिकारीले कोष संचालनको कार्यविधि, लगानी र पछिल्लो संशोधित विषयहरुको बारेमा बताउनु भएको थियो भने यसको महत्वबारे पनि प्रस्तुति दिनु भएको थियो ।

कार्यक्रममा संघका निवर्तमान अध्यक्ष उमानाथ पौडेल, पूर्वअध्यक्ष विष्णु न्यौपाने लगायतले आफ्नो धारणा राख्दै कोष अझै बढी ब्यवसायी केन्द्रित भई संशोधित हुनुपर्ने बताउनु भयो । योजना राम्रो भए पनि अझै पनि केही आशंकाहरु चिर्न जरुरी रहेको बताउनु भयो ।

कार्यक्रममा ब्यवसायीले पनि आफ्ना जिज्ञासा राखेका थिए । कार्यक्रममा संघका अधिकांश पदाधिकारीको सहभागिता थियो । कार्यक्रमको संचालन महासचिव मनोज पौडेलले गर्नु भएको थियो ।

यसैबीच संघले मंगलबार नै संघका निवर्तमान वरिष्ठ उपाध्यक्ष रुक बहादुर भुसालकी आमा यमकला भुसालको निधनप्रति शोक ब्यक्त गरेको छ ।

भुसालको निवास बाणगंगा ७ बनगाइमा पुगेर अध्यक्ष घिमिरे लगायतले यमकलाको तस्विरमा माल्यापर्ण गरेका थिए भने एक मिनेट मौन धारण पनि गरिएको थियो । यमकलाको यही चैत्र १३ गते निधन भएको थियो ।