इंग्लिस प्रिमियर लिगः एभर्टनलाई महत्वपूर्ण जित

एजेन्सी ।
इंग्लिस प्रिमियर लिग फुटबलको शीर्ष चारमा रहँदै आउँदो सिजनको च्याम्पियन्स लिगका लागि छनौट हुने सम्भावना एभर्टनले जीवित राखेको छ ।

प्रिमियर लिग अन्तर्गत सोमबार राति भएको खेलमा घरेलु टोली एभर्टनले साउथह्याम्पटनमाथि १–० को जित दर्ता गरेको हो । नवौँ मिनेटमा रिचार्लिसनले गरेको गोल नै एभर्टनको जितका लागि निर्णायक साबित भयो । जितपछि सातौँ स्थानको एभर्टनको २५ खेलबाट ४३ अंक भएको छ ।

पाँचौँ स्थानको चेल्सीको २६ खेलबाट ४४ तथा छैटौँ स्थानको लिभरपुलको २६ खेलबाट ४३ अंक छ । चौथो स्थानको वेष्ट ह्यामको २६ खेलबाट ४५ अंक छ । आउँदो बिहीबार हुने खेलमा जित निकालेमा एभर्टन प्रतिस्पर्धीलाई पछि पारेर शीर्ष चारमा पुग्ने छ ।