स्वारेजले गरे दुई गोल, तर एथ्लेटिको जित बिहीन

एजेन्सी ।
लुइस स्वारेजको दुई गोलका बाबजुद एथ्लेटिको मड्रिड बराबरीमा रोकिन बाध्य भएको छ । स्पेनिस ला लिगा फुटबल अन्तर्गत सोमबार राति भएको खेलमा सेल्टा डी भिगोले शीर्ष स्थानको एथ्लेटिको मड्रिडलाई २–२ को बराबरीमा रोकेको हो ।

सेल्टाका लागि १३ औँ मिनेटमा मिना लोरेन्जोले गोल गरि सुरुवाति अग्रता दिलाए । ४५ औँ मिनेटमा एथ्लेटिकोका लागि बराबरी गोल गरेका स्वारेजले त्यसको पाँच मिनेटपछि व्यक्तिगत दोस्रो गोल गरि टिमलाई अग्रता दिलाए ।

तर ८९ औँ मिनेटमा फेरियराले सेल्टाका लागि बराबरी गोल फर्काए ।

एथ्लेटिकोका लागि दुई गोल गरेका स्वारेजले अहिलेसम्म यो सिजन लिगमा १६ गोल गरेका छन् र उनी सर्वाधिक गोलकर्ताको सूचिमा शीर्ष स्थानमा छन् । बराबरी पछि पनि शीर्ष स्थानको एथ्लेटिको मड्रिडको २० खेलबाट ५१ अंक भएको छ ।