दरबारमार्ग र आसपासमा सार्वजनिक गाडीलाई प्रवेश निषेध, चक्रपथभित्र बस चलाउन रोक

काठमाण्डौ ।

हिजो नेकपाको प्रचण्ड-नेपाल समूहको आमहड्तालले हैरान खेपेका नागरिकले आज पनि सास्ती पाउने भएका छन् । अहिले काठमाण्डौको दरबारमार्ग आसपासमा सार्वजनिक गाडीलाई प्रवेशमा रोक लगाइएको छ ।

नारायणहिटीको अगाडिपट्टि आज नेकपाको केपी शर्मा ओली समूहले जनसभा गर्दैछ । यसकै कारण सार्वजनिक गाडीलाई प्रवेशमा रोक लगाइएको हो । अहिले यो मार्ग भएर साना निजी गाडी भने चलिरहेका छन् । यस्तै, जनसभालाई ध्यानमा राखेर दरबारमार्ग क्षेत्र हुँदै चल्ने गाडीलाई ठाउँ-ठाउँबाट डाइभर्सन गरिएको छ ।

जयनेपाल हल, माइघर मण्डला, थापाथली, सिंहदरबार, त्रिपुरेश्वर, लैनचौर, सोह्रखुट्टे, पुतलीसडक, कृष्णपाउरोटी, पद्मोदयमोडलगायत क्षेत्रबाट गाडी भर्सन गरिएको महानगरीय ट्राफिक प्रहरी महाशाखाले जनाएको छ। यस्तै, यात्रुबाहक ठूला सार्वजनिक बसलाई चक्रपथ भित्र चलाउन पनि दिईएको छैन । जनसभाका कारण बढ्ने चापलाई मध्यनजर गर्दै यात्रुबाहक बसलाई चक्रपथमा मात्रै चलाउन दिईएको महाशाखाले जनाएको छ ।
ओली समूहको जनसभामा आउन काठमाण्डौका ठाउँ-ठाउँमा अहिले नेता कार्यकर्ता भेला हुन थालेका छन् । जिल्ला बाहिरबाट पनि नेता कार्यकर्ता काठमाण्डौ आएका छन् ।