जुवा खालबाट जिसस प्रमुख पक्राउ

दाङ ।
जिल्ला समन्वय समिति (जिसस) रुकुम पूर्वका प्रमुखसहित गजेन्द्रबहादुर वलीसहित जुवा खेलिरहेको अवस्थामा पक्राउ परेका छन् ।

प्रहरी कार्यालयका रुकुम पश्चिमका प्रहरी निरीक्षक कपिल शाहीका अनुसार प्रमुख वलीसहित पाँचजना पक्राउ परेका छन् । पक्राउ पर्नेमा प्रमुख वली, पृथा उत्तरगंगा गाउँपालिका–५ का २९ वर्षीय सुभाष घर्तीमगर, वडा नम्वर १० का ६४ वर्षीय जितेन्द्र बुढामगर, रुकुम पश्चिम त्रिवेणी गाउँपालिका–७ का ४२ वर्षीय लिलबहादुर पुन र मुसिकोट नगरपालिका–१ का ३७ वर्षीय कमल गिरी रहेका छन् ।

रुकुम पश्चिमको मुसिकोट–१ पातुखोलास्थित भरत घर्तीमगरको घरमा जुवा खेलिरहेको भन्ने सूचनाको आधारमा खटिएको प्रहरी टोलीले शुक्रवार दिउँसो करिब ३ बजेतिर उनीहरुलाई नियन्त्रणमा लिएको हो। उनीहरुको साथबाट २५ हजार ३०० रुपैयाँ र केही थान तास बरामद गरेको प्रहरी निरीक्षक शाहीले बताए। पक्राउ परेकाहरुमाथि अनुसन्धान भइरहेको प्रहरीले जनाएको छ।