रोनाल्डोको दुई गोलको मद्धतमा युभेन्टस पाँचौँ स्थानमा

एजेन्सी ।
क्रिष्टियानो रोनाल्डोले इटालियन सिरी ए अन्तर्गत आइतबार रातिको खेलमा युभेन्टसलाई जिताउने क्रममा दुई गोल गरेर एक गोलका लागि सहयोग गरेका छन् ।

घरेलु मैदानमा भएको खेलमा युभेन्टसले युडिनेसलाई ४–१ ले पराजित गरेको हो । युभेन्टसका लागि रोनाल्डोले ३१ र ७० औँ मिनेटमा गोल गरि ४९ औँ मिनेटमा चिएसाको गोलका लागि सहयोग गरेका हुन् । रोनाल्डोले यो सिजन सिरी ए मा अहिलेसम्म ११ खेलमा १४ गोल गरिसकेका छन् ।

यस्तै युभेन्टसका लागि इन्जुरी समयको तेस्रो अर्थात ९३ औँ मिनेटमा पाउलो डिबालाले गोल गरे । युडिनेसका लागि ९० औँ मिनेटमा जीगेलारले एक गोल फर्काए ।

जितपछि १४ खेलबाट २७ अंक जोडेको युभेन्टस पाँचौँ स्थानमा पुगेको छ । साबिक विजेता उ शीर्ष स्थानको एसी मिलान भन्दा १० अंकले पछि छ ।