काठमाडौँ ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गरेको संसद् विघटन विरुद्ध प्रतिनिधिसभामा बहुमत सांसदहरुको हस्ताक्षरसहित मंगलबार नेपाली कांग्रेसका अध्यक्ष शेरबहादुर देउवा, नेकपाका अध्यक्ष पुष्पकमल दाहाल र वरिष्ठ नेता माधवकुमार नेपाल सर्वोच्च अदालत जाने भएका छन्।
अधिवक्ता गोविन्द बन्दीले बहुसंख्यक सांसदहरुको हस्ताक्षरसहित नेपाली कांग्रेस, नेकपा र जनता समाजवादी पार्टीका शीर्ष नेताहरु मंगलबार सर्वोच्च अदालत जाने जानकारी दिए।
नेकपाको असन्तुष्ट पक्ष, नेपाली कांग्रेस र जसपाको सोमबार बसेको बैठकले यसबारे निर्णय गरेको र नेपाली कांग्रेसको नेतृत्वमा सानेपमा बसेको सर्वदलीय बैठकमा पनि यसबारे छलफल भइरहेको एक नेताले जानकारी दिए।
प्रतिनिधिसभामा २७५ जना सांसद हुन्छन्। तीमध्ये १३८ जना सांसदको हस्ताक्षरसहित सर्वोच्च अदालतमा संसद विघटनको निर्णय रोक्न माग गर्दै मंगलबार बिहान निवेदन लिएर जाने तयारी भएको अधिवक्ता बन्दीले जानकारी दिए।
प्रधानमन्त्री ओलीले आकस्मिक रुपमा आइतबार बिहान गरेको संसद विघटनको प्रस्ताव गैरसंवैधानिक भन्दै नेकपाका असन्तुष्ट पक्षसहित विपक्षी नेताहरु यसबिरुद्ध रणनीति बनाउन व्यस्त छन्।
प्रतिक्रिया