हिमालय जोगाउन विश्व तापमान नियन्त्रण गर्न प्रधानमन्त्रीको आग्रह

काठमाडौं ।
प्रधानमन्त्री केपी शर्मा ओलीले नेपाल जलवायु परिवर्तनको असर कम गर्दै त्यसका उपाय पालना गर्न सधैँ प्रतिबद्ध रहेको बताउनुभएको छ । क्लाइमेट एक्स समिट-२०२० लाई सम्बोधन गर्दै प्रधानमन्त्री ओलीले समुद्रको पर्यावरण सन्तुलन कायम राख्न हिमालय क्षेत्रको महत्त्वलाई चिन्न विश्व समुदायलाई आग्रह पनि आग्रह गर्नुभयो । हिमालय जोगाउन विश्व तापमान नियन्त्रण गर्नसमेत उहाँको आग्रह छ । हरित यात्रामा एकसाथ अगाडि बढ्न नेपालले सबै देशको साथ अपेक्षा गरेको पनि उहाँले बताउनुभएको छ ।

प्रधानमन्त्रीले हरित वृद्धि र हरित पुनरुत्थान प्रवर्द्धन गर्न नेपालले सफा तथा नवीकरणीय ऊर्जा उत्पादनलाई प्राथमिकता दिएको बताउनुभयो । प्रधानमन्त्री ओलीले कोभिड-१९ ले कोप-२६ स्थगित गर्न बाध्य तुल्याए पनि सफा एवं हरित धर्ती निर्माणसम्बन्धी अभियान स्थगित हुन नसक्ने औंल्याउनुभयो ।

सम्मेलन आयोजक राष्ट्र चिली, फ्रान्स, इटाली, बेलायतसहित तथा संयुक्त राष्ट्रसङ्घीय नेतृत्वको उहाँले सराहना गर्नुभएको छ ।

यस्तो छ प्रधानमन्त्री ओलीले गर्नुभएको सम्बोधन

महामहिमज्यूहरु, विशिष्ट महानुभावहरु, यस सम्मेलनको आयोजना गर्नुभएकोमा म चिली, फ्रान्स, इटली, संयुक्त अधिराज्य र संयुक्त राष्ट्र संघको नेतृत्वको सराहना गर्दछु । कोभिड-१९ ले हामीलाई कोप-२६ स्थगन गर्न बाध्य तुल्यायो । तथापि, सफा एवं हरित धरा निर्माणसम्बन्धी हाम्रा अभियान स्थगित हुन सक्दैनन्।

नेपाल पेरिस सम्झौता एवं विश्वव्यापी तापक्रम १.५ डिग्रीमा सीमित राख्ने आह्वानको दरिलो समर्थन गर्दछ । हामी जलवायु उत्थानशील विकासको प्रवर्द्धनका लागि प्रतिबद्ध छौं र कार्बन शून्य अर्थतन्त्रको लक्ष्यतर्फ गतिशील छौं । हरित वृद्धि र हरित पुनरुत्थान प्रवर्द्धनका लागि हामीले सफा तथा नवीकरणीय उर्जा उत्पादनलाई प्राथमिकता दिएका छौं, विद्युतीय परिवहन, न्यून कार्बन पूर्वाधार र पर्या-पर्यटनको प्रवर्द्धन गरेका छौं ।

हामीले सन् २०३० सम्ममा संरक्षित क्षेत्र विस्तार गरी २३ प्रतिशतबाट ३० प्रतिशत पुर्‍याउने र जैविक विविधताको जगेर्ना गर्ने लक्ष्य लिएका छौं । विश्वव्यापी तापक्रम वृद्धि नियन्त्रण गर्न र समुद्रको पर्यावरणीय सन्तुलन कायम राख्न हिमालयको महिमा बोध गर्नका लागि म विश्वलाई आग्रह गर्दछु ।

नेपालले यस वर्षको अन्त्यसम्ममा परिस्कृत एनडीसी प्रस्तुत गर्नेछ र सन् २०५० भित्र शून्यस्प्राय कार्बन उत्सर्जनको परिदृश्यमा पुग्न महत्वाकांक्षी दीर्घकालीन रणनीति तर्जुमा गर्नेछ । हामी सन् २०२१ सम्ममा राष्ट्रिय अनुकूलन योजना एवं तदनुकूल जलवायु वित्त रणनीति र मार्गचित्र निर्माण गर्दैछौं ।

सन् २०३० सम्ममा हामी सबै ७५३ वटै पालिकामा जलवायु उत्थानशील अनुकूलन योजना लागू गर्नेछौं । यी महत्त्वाकांक्षाहरु लागू गर्नका लागि हामीलाई जलवायु वित्तमा सहज र पर्याप्त पहुँच अत्यावश्यक हुन्छ । हरित यात्रामा एकसाथ अघि बढ्न हामीले सबै देशहरुको साथ अपेक्षा गर्दछौं । धन्यवाद ।