ला लिगामा बार्सिलोनालाई काडिजले हरायो

एजेन्सी ।
लिगमा आफ्नो पुरानो लय कायम गर्न निकै कठिन प्रयास गरिरहेको बार्सिलोना ला लिगा अन्तर्गत शनिबार राति भएको खेलमा पराजित भएको छ ।

घरेलु मैदानमा भएको खेलमा काडिजले बार्सिलोनालाई २–१ ले पराजित गरेको हो । काडिजले सन् १९९१ पछि पहिलो पटक ला लिगामा बार्सिलोनामाथि जित दर्ता गरेको हो ।

काडिजका लागि आठौँ मिनेटमा अल्भारो जिमिनेजले गोल गरे । ५७ औँ मिनेटमा काडिजका पेड्रो अल्कालाले आत्मघाती गोल गरेपछि बार्सिलोना बराबरीमा आयो ।

तर ६३ औँ मिनेटमा अल्भारो नेग्रेडोले काडिजका लागि विजयी गोल गरे । जित निकालेको काडिज १२ खेलबाट १८ अंकसहित पाँचौँ स्थानमा पुगेको छ । पराजित भएको बार्सिलोना १० खेलबाट १४ अंकसहित सातौँ स्थानमा छ ।