रोकिएन सवारी दुर्घटना, गयराति रुकुमपश्चिममा ४ जनाको मृत्यु

रुकुम ।

पछिल्लो केही दिन यता देशभर सवारी दुर्घटना रोकिएका छैनन् । भएका दुर्घटनामा दुई वा दुईभन्दा धेरैको दैनिक अकालमै ज्यान गइरहेको छ । यसैबीच फेरि रुकुममा अर्को ठुलो दुर्घटना भएको छ ।

रुकुमपश्चिमको आठबीसकोट नगरपालिका–७ को पोखरामा जन्ती बोकेको जिप दुर्घटना हुँदा चार जनाको मृत्यु भएको हो । शुुक्रबार राति ८ बजे आठबीसकोट घारीखोलाबाट जन्ती लिएर आठबीसकोट– ८ दाँजेतर्फ जाँदै गरेको रा १ ज ५८९ नम्बरको जिप दुर्घटना भएको प्रहरीले जनाएको छ ।

दुर्घटनामा आठबीसकोट–८ का अन्दाजी ५१ वर्षीय गोरे नेपाली, ६६ वर्षीय सार्के नेपाली, ४८ वर्षीय आइते चदारा र सोही नगरपालिका–७ का ५१ वर्षीय कलिभान नेपालीको घटनास्थलमै मृत्यु भएको जिल्ला प्रहरी कार्यालय रुकुमपश्चिममा प्रमुख डीएसपी ठगबहादुर केसीले जानकारी दिए । ६० वर्षीय लालबहादुर नेपाली सख्त घाइते भएका छन् ।

यात्रु ओराल्ने क्रममा जीप पछाडी सरेर दुर्घटना भएको र चालक फरार रहेको जिल्ला प्रहरी कार्यालय रुकुमपश्चिमले जनाएको छ ।