चेल्सी च्याम्पियन्स लिगको अन्तिम १६ मा, जिरउड बने नायक

एजेन्सी ।
समूह चरणका दुई खेल बाँकी हुँदै इंग्लिस क्लब चेल्सीले च्याम्पियन्स लिग फुटबलको नकआउट चरणमा स्थान पक्का गरेको छ । समूह ई अन्तर्गत मंगलबार राति भएको खेलमा फ्रेन्च क्लब रेनलाई २–१ ले पराजित गरेको चेल्सी अन्तिम १६ मा पुग्ने पक्का भएको हो ।

अवे मैदानमा भएको खेलमा चेल्सीका लागि २२ औँ मिनेटमा हड्सन–ओडोइ र इन्जुरी समयको पहिलो अर्थात ९१ औँ मिनेटमा ओलिभर जिरउडले गोल गरे । रेनका लागि ८५ औँ मिनेटमा गुइरासीले एक गोल फर्काए ।

जितको नायक बनेको ओलिभर जिरउडले यो सिजन चेल्सीबाट मात्रै १२७ मिनेट खेलेका छन् । तर हरेक पटक इन्जुरी समय तिर टिमलाई महत्वपूर्ण जित दिलाउन गोल गर्ने गरेका छन् ।

जितपछि चेल्सीको १० अंक भएको छ । मंगलबार राति नै भएको खेलमा एफके क्रास्नोडरलाई २–१ ले पराजित गरेको सेभिल्लाको पनि समान १० अंक नै छ र उसले पनि अन्तिम १६ मा स्थान पक्का गरेको छ ।